کراچی: شہر قائد کے علاقے کیماڑی میں زہریلی گیس کے اخراج سے 4 افراد جاں بحق ہوگئے۔
تفصیلات کے مطابق کراچی کے علاقے کیماڑی میں زہریلی گیس پھیل گئی جس کے نتیجے میں 2 خواتین سمیت 4 افراد جاں بحق ہوگئے، زہریلی گیس سے 25 افراد متاثر ہوئے۔
ریسکیو ذرائع کا کہنا ہے کہ زہریلی گیس سے متاثرہ افراد کو جناح اسپتال منتقل کردیا گیا ہے۔
ایس پی کیماڑی کا کہنا ہے کہ جاں بحق افراد کی شناخت میمار بیگم، رضوان، احسن کے ناموں سے ہوئی ہے جبکہ ہلاکتوں میں اضافے کا خدشہ ہے۔
ریسکیو ذرائع کے مطابق زہریلی گیس سے متاثرہ افراد کو سانس لینے میں شدید دشواری کا سامنا ہے۔
ایس ایچ او جیکسن ملک عادل کا کہنا ہے کہ کیماڑی میں زہریلی گیس سے متاثر 60 سالہ خاتون جاں بحق ہوئی ہیں جبکہ متاثرہ افراد کو اسپتال منتقل کردیا گیا ہے، واقعے کی تفصیلات معلوم کررہے ہیں ابھی کچھ نہیں کہا جاسکتا۔
مقامی شہری سلمان خان کا کہنا ہے کہ گیس کی بو کیماڑی کے دور دراز علاقوں میں پھیلی ہوئی ہے اور لوگوں نے ماسک پہن لیے ہیں۔
ترجمان کے پی ٹی کا کہنا ہے کہ ہمارے پاس کوئی جہاز آیا ہی نہیں جس سے بو پھیلے، پورٹ پر کوئی ایسا جہاز لگا بھی نہیں ہے جس سے بو پھیلی ہو۔
ترجمان کے پی ٹی کا کہنا ہے کہ تمام متاثرہ افراد کو سڑک سے اٹھایا گیا ہے، پورٹ پر بو پھیلنے کی کوئی اطلاع نہیں ہے۔
وفاقی وزیر علی زیدی کا کہنا ہے کہ کیماڑی میں زہریلی گیس کے اخراج سے اموات پر صدمہ پہنچا ہے، واقعہ پورٹ کی حدود میں پیش نہیں آیا، کے پی ٹی حکام معاملے کی انکوائری کے لیے روانہ ہوگئے ہیں، حقائق سامنے آنے تک میڈیا قیاس آرائیوں سے گریز کرے۔
وزیراعلیٰ سندھ نے واقعے کا نوٹس لیتے ہوئے کمشنر کراچی سے فوری رپورٹ طلب کرلی، مراد علی شاہ نے کمشنر کراچی کو ہدایت کی کہ متاثرہ افراد کو بہتر سہولتیں فراہم کی جائیں، ڈپٹی کمشنر اور ایس ایس پی اسٹاف کے ذریعے عوام کی مدد کریں۔
