کراچی: کھارادر دھماکے کا مقدمہ سرکاری مدعیت میں درج کرلیا گیا ، مقدمے میں قتل، اقدام قتل ، دہشت گردی سمیت دیگردفعات شامل کی گئی ہیں۔
تفصیلات کے مطابق کراچی کے علاقے کھارادر میں دھماکے کا مقدمہ سی ٹی ڈی میں درج کرلیا گیا۔
پولیس کا کہنا ہے کہ مقدمہ ایس ایچ او کھارادر ماجد علوی کی مدعیت میں درج کیا گیا، جس میں دہشت گردی، ایکسپلوزو ایکٹ، قتل، اقدام قتل کی دفعات شامل کی گئی ہیں۔
مقدمے کے متن میں کہا گیا ہے کہ نامعلوم دہشت گردوں نے سہولت کاروں کی مدد سے عرفات مارکیٹ میں پولیس موبائل کو نشانہ بنایا، دھماکے کے نتیجے میں پولیس موبائل کے اگلے حصے کو نقصان پہنچا۔
دھماکے سے ایک موٹرسائیکل کے ٹکڑے ملے جبکہ پانچ سے چھ موٹرسائیکلوں اور ایک رکشے کو نقصان پہنچا۔
واضح رہے کراچی میں ایم اے جناح روڈ میمن مسجد کے قریب اقبال کلاتھ مارکیٹ میں دھماکا ہوا تھا ، جس میں ایک خاتون جاں بحق اور 11 افراد زخمی ہوگئے تھے۔
حکام کا کہنا تھا کہ دہشت گردوں کا ہدف پولیس موبائل تھی، دھماکا اس وقت کیا گیا جب پولیس موبائل دھماکے میں استعمال ہونے والی موٹر سائیکل کے قریب تھی۔
پولیس نے بتایا تھا کہ بم نے 20 سے 25 میٹر اطراف کے ایریا میں شدید تباہی پھیلائی، اور دھماکے کے مقام پر 3 سے 4 گڑھے پڑ گئے۔
