کراچی: پی ایس ایل کی معروف ٹیم کراچی کنگز نے اسٹار فاسٹ بولر محمد عامر کے انجرڈ ہونے کے بعد ان کے متبادل کا اعلان کردیا ہے۔
اے آر وائی نیوز کے مطابق محمد عامر کی جگہ فاسٹ بولر عثمان شنواری کو کراچی کنگز میں شامل کرنےکا فیصلہ کیا گیا ہے، محمد عامر سائیڈ اسٹرین انجری کی وجہ سے ان فٹ ہوکر پی ایس ایل سیون سے باہر ہوچکے ہیں۔
اس کے علاوہ فاسٹ بولر محمد الیاس بھی باقی میچز کے لیے ٹیم کو دستیاب نہیں ہوں گے، محمد الیاس کو لاہور قلندرز کے خلاف فیلڈنگ کرتے ہوئے کندھے پر چوٹ لگی تھی، جس پر ڈاکٹرز نے فاسٹ بولر کو باقی میچز کھیلنے سے روک دیا ہے تاہم محمد الیاس کی جگہ فی الحال کراچی کنگز نے متبادل نہ لینےکا فیصلہ کیاہے۔
یہ بھی پڑھیں:کراچی کنگز کو بڑا دھچکا، 3 کھلاڑی انجری کا شکار
دوسری جانب کراچی کنگز کے وکٹ کیپر بلے باز جو کلارک کی فٹنس میں بہتری آئی ہے اور وہ آئندہ میچز کے لئےٹیم کو دستیاب ہوں گے۔
واضح رہے کہ کراچی کنگز نے ایونٹ میں تین میچز کھیلے ہیں اور تینوں میں ہی شکست کا سامنا کرنا پڑا ہے، کراچی کنگز اپنا چوتھا میچ آج پشاور زلمی کے خلاف کھیلے گی۔
یاد رہے کہ گذشتہ روز پی ایس ایل 7 کے دسویں میچ میں اسلام آباد یونائیٹڈ نے کوئٹہ گلیڈی ایٹرز کو 43 رنز سے شکست دی تھی۔
