The news is by your side.

Advertisement

لیاری کوئلہ گودام کے قریب منہدم عمارت سے متعلق انکشافات

کراچی: شہر قائد کے علاقے لیاری میں کوئلہ گودام کے قریب بہار کالونی میں عمارت منہدم ہونے کی وجہ سامنے آ گئی۔

اے آر وائی نیوز کے مطابق لیاری بہار کالونی میں منہدم عمارت کے اطراف پلاٹ پر ایکسکیویٹر کے ذریعے کھدائی جاری تھی، دوران کھدائی مشین دیوار سے ٹکرائی جس سے عمارت کا پچھلا حصہ گر گیا۔

معلوم ہوا ہے کہ حادثے کے بعد ایس بی سی اے ٹیم منہدم عمارت کا سروے کرنے پہنچ گئی تھی، اتھارٹی کے حکام کا کہنا ہے کہ عمارت کے اطراف میں پلاٹ پر ایکسکیویٹر کے ذریعے کھدائی کی جا رہی تھی، اس دوران مشین دیوار سے ٹکرانے کی وجہ سے عمارت کا پچھلا حصہ گرا۔

ایس بی سی اے کا کہنا ہے کہ گرنے والی عمارت کے اطراف تمام مکانات کو خالی کرا لیا گیا ہے، عمارت کے نیچے گودام غیر قانونی طور پر قائم تھا، جس پر پلاٹ کے مالک اور ایکسکیویٹر ڈرائیور کے خلاف کارروائی کی جائے گی۔

کراچی: لیاری میں 2 منزلہ رہائشی عمارت گرگئی، 2 افراد جاں بحق

حکام کا کہنا ہے کہ گرنے والی عمارت کے اطراف مکانات کا سروے بھی کیا جا رہا ہے، عمارت کے اطراف سیل گھروں کو مکمل توڑا جائے گا۔

ادھر لیاری کوئلہ گودام کے قریب عمارت گرنے کے واقعے کے سلسلے میں اہل علاقہ نے انکشاف کیا ہے کہ عمارت کو بہ طور سرائے استعمال کیا جا رہا تھا، گراؤنڈ فلور پر گودام اور اوپر کمرے بنے ہوئے تھے، گراؤنڈ پلس وَن عمارت کی کوئی بنیاد نہیں تھی۔

اہل علاقے نے بتایا کہ عمارت گارڈر اور ٹی آر پر کھڑی تھی، مزدور پیشہ افراد سرائے میں رہائش پذیر تھے، چھٹی کے باعث تمام افراد سرائے میں موجود تھے، سرائے سے متصل پلاٹ پر عمارت تعمیر کی جانی تھی، جس کی بنیادوں کے لیے کھدائی بھی کی گئی۔

اہل علاقہ کے مطابق متصل پلاٹ پر تعمیرات کے لیے ہیوی مشین کے استعمال سے روکا گیا تھا، ہیوی مشین کے استعمال کے باعث سرائے کا ایک حصہ زمین بوس ہوا۔

Comments

یہ بھی پڑھیں