کراچی: قیوم آباد چورنگی کے قریب اوباش نوجوانوں نے کار سوار خاتون سے بدتمیزی کرتے ہوئے ہراساں کیا اور گاڑی کی ونڈ اسکرین توڑ دی۔
تفصیلات کے مطابق کراچی کے علاقے قیوم آباد چورنگی کے قریب اوباش نوجوانوں نے خاتون سے شدید بدتمیزی کی۔
متاثرہ خاتون نے بتایا کہ نوجوانوں نے گاڑی کا پیچھا کیا اور ہراساں کیا، آوازیں کسی اور جب موٹرسائیکل کو کار سے ٹکر مار کر روکی تو جھگڑا بن گیا۔
والدہ سے بدتمیزی اور تشدد ہوتا دیکھ کر بچی زارو قطار رونے لگی، دونوں اوباش نوجوان مجمعے کے سامنے خاتون کو دھمکیاں دیتے رہے اور کار کی ونڈ اسکرین کو بھی توڑ دیا۔
خاتون کے مطابق کوئی شخص ان کی مدد کو آگے نہیں آ رہا تھا، دونوں افراد مسلسل کار کا پیچھا کرتے اور ہوٹنگ کرتے آرہے تھے۔
واقعے کی ویڈیو میں دونوں افراد کے چہرے واضح طور پر دیکھے جا سکتے ہیں ،خاتون چیختی رہی کہ مجھے میرے شیشے کے پیسے دو، تم نے شیشہ توڑا ہے۔
پولیس نے خاتون کو ہراساں کرنے والے دونوں افراد کیخلاف مقدمہ درج کرلیا ہے، مقدمہ خاتون کے کپڑے پھاڑ نے بدتمیزی کرنے اور کار کو نقصان پہنچانے پر کیا گیا۔
پولیس نے اوباش نوجوانوں کی تلاش شروع کردی ہے۔
