The news is by your side.

Advertisement

اردگرد نظر رکھیں، کراچی پولیس نے گلی محلوں میں اعلانات شروع کردیے

کراچی میں حالیہ دہشتگردی کے واقعات میں اضافے کے بعد پولیس نے  شہر قائد کے گلی محلوں میں اردگرد نظر رکھنے کے اعلانات کرانے شروع کردیے ہیں۔

اے آر وائی نیوز کے مطابق کراچی میں حالیہ دہشتگردی کے بڑھتے واقعات کے بعد پولیس بھی چوکس ہوگئی ہے اور اس نے عوامی آگاہی مہم شروع کرتے ہوئے شہر بھر میں گلی محلوں کی سطح پر اعلانات شروع کردیے ہیں۔

پولیس کی جانب سے گلی محلوں میں لاؤڈ اسپیکرز کے ذریعے اعلانات کیے جارہے ہیں کہ عوام اردگرد کے حالات اور مشکوک افراد پر نظر رکھیں اور مشکوک موٹر سائیکل کھڑی نظر آئے تو آگاہ کریں۔

پولیس کی جانب سے عوام کی آگاہی کیلیے یہ بھی اعلان کیا جارہا ہے کہ اگر وہ اپنے محلے میں کسی مشکوک شخص کو دیکھیں تو اس سے پوچھ گچھ کریں۔

واضح رہے کہ کراچی کی پرامن فضا کو حال ہی میں دہشتگردی کے بڑھتے واقعات نے مکدر کردیا ہے۔

 

گزشتہ ماہ کراچی یونیورسٹی میں خودکش دھماکے میں 3 چینی اساتذہ سمیت 5 افراد ہلاک ہوئے تھے جب کہ گزشتہ ہفتے صدر اور دو روز قبل بولٹن مارکیٹ جیسے مصروف علاقوں میں موٹر سائیکل بم دھماکے ہوئے ہیں جس میں ایک نوجوان اور خاتون جاں بحق ہوئے۔

کراچی میں بڑھتے دہشتگردی کے واقعات نے جہاں عوامی سطح پر تشویش میں اضافہ کردیا ہے وہیں مختلف سرکاری اور نجی اداروں کی جانب سے بھی سیکیورٹی انتظامات سخت کردیے گئے ہیں۔

Comments

یہ بھی پڑھیں