بین الصوبائی ڈکیت گروہ گرفتار، مسروقہ سامان بر آمد، ایس پی نیو کراچی
The news is by your side.

Advertisement

کراچی، بین الصوبائی ڈکیت گروہ گرفتار، مسروقہ سامان بر آمد

کراچی : سرسید پولیس نے ایک کارروائی کے دوران بین الصوبائی ڈکیت گروہ کے 6 ارکان کو گرفتار کر کےطلائی زیورات، موبائل فونز، لیپ ٹاپ اور دیگر قیمتی سامان برآمد کرلیا ہے۔

ایس پی نیو کراچی کے مطابق 15 رکنی گروہ کے6 ارکان کو حراست میں لیا گیا ہے یہ ملزمان نارتھ کراچی، شادمان ٹاؤن اور نارتھ ناظم آباد میں کچرا چننے کے بہانےگھروں میں داخل ہو کر ڈکیتیاں کیا کرتے تھے۔

ایس پی نیو کراچی کا کہنا تھا کہ حراست میں لیے گئے ملزمان سے اہم معلومات حاصل ہوئی ہیں جس کے تحت باقاعدہ حکمت عملی سے گروہ کے دیگر ارکان کو بھی گرفتار کیا جائے گا اور ضلع وسطی کے لوگوں کو اس اذیت سے نجات دلائی جائے گی۔

انہوں نے مزید کہا کہ اس گروہ میں نوے فیصد افغان باشندے شامل ہیں جو دوران واردات افغانی اور پشتو زبان میں ایک دوسرے سے گفتگو کر تے تھے سر سید پولیس نے موثر نگرانی اور بہترین منصوبہ بندی کر کے ڈاکوؤں کو گرفتار کیا ہے جو کہ قابل ستائش عمل ہے۔

واضح رہے کہ عرصہ دراز سے سر سید اور شاہراہ نورجہاں تھانے کے مکین شکایات درج کروا رہے تھےکہ کچرا چننے والےافغانی علی الصبح گھروں میں داخل ہوکر اہل خانہ کو یرغمال بناتے اور انہیں قیمتی اشیاء سے محروم کردیتے ہیں جس کے بعد ملزمان کی گرفتاری کے لیے خصوصی ٹیم تشکیل دی گئی تھی۔

Comments

comments

یہ بھی پڑھیں