کراچی: شہر قائد کے علاقے محمود آباد میں موٹر سائیکل نہ ہٹانے پر پولیس اہلکاروں نے نوجوان کو تشدد کا نشانہ بنا ڈالا۔
اے آر وائی نیوز کی رپورٹ کے مطابق کراچی کے علاقے محمود آباد کشمیر کالونی میں پولیس اہلکاروں نے موٹرسائیکل نہ ہٹانے پر نوجوان پر بہیمانہ تشدد کیا، اے آر وائی نیوز پر شہری کے تشدد کی خبر نشر ہونے پر پولیس نے ایکشن لے لیا۔
ذرائع کے مطابق پولیس اہلکاروں نے 4 اکتوبر کے روز نوجوان اسامہ کو راستے سے بائیک جلدی نہ ہٹانے پر تشدد کا نشانہ بنایا تھا، پولیس اہلکاروں کی نوجوان پر تشدد کی سی سی ٹی وی فوٹیج منظرعام پر آگئی۔
نمائندہ اے آر وائی نیوز کے مطابق پولیس نے تفتیش کے بعد نوجوان پر تشدد میں ملوث ایک اہلکار حارث نیازی کو گرفتار کرلیا، تشدد میں ملوث دیگر اہلکاروں کی تلاش جاری ہے۔
پولیس کا کہنا ہے کہ نوجوان کو تشدد کا نشانہ بنانے والے اہلکاروں کے خلاف محکمہ جاتی کارروائی عمل میں لائی جائے گی۔
مزید پڑھیں: پولیس کا نوجوان پر بدترین تشدد، تھانے سے باہر پھینک دیا
واضح رہے کہ چند ماہ قبل ایبٹ آباد میں پولیس گردی کا افسوسناک واقعہ پیش آیا تھا جہاں تھانہ ڈونگا گلی پولیس نے نوجون کو بدترین تشدد کا نشانہ بنانے کے بعد حالت غیر ہونے پر تھانہ سے باہر پھینک دیا تھا۔
متاثرہ شخص کا کہنا تھا کہ پولیس نے مجھے زخمی حالت میں تھانے سے باہر پھینکا، اس دوران مقامی افراد گاڑی میں ڈال کر اسپتال منتقل کیا۔
متاثرہ شخص کا کہنا تھا کہ پولیس سے تشدد کرنے کی وجہ پوچھتا رہا لیکن انہوں نے کچھ نہیں بتایا اور تشدد کا نشانہ بناتے رہے، انہوں نے وزیراعظم عمران خان اور وزیر اعلیٰ کے پی محمود خان سے انصاف کی اپیل کی تھی۔
