کراچی: سندھ کچی آبادی اتھارٹی نے کراچی کی کچی آبادیوں میں غیر قانونی تعمیرات کو گرانے کے نوٹسز جاری کردیے۔

تفصیلات کے مطابق سندھ حکومت نے کچی آبادیوں میں غیر قانونی تعمیرات اور عمارات کو مسمار کرنے کا فیصلہ کیا ہے جس کے لیے سندھ بلڈنگ کنٹرول اتھارٹی اور کچی آبادی کا خصوصی سیل قائم کردیا گیا جس کے بعد کچی آبادیوں کو گرانے کے نوٹسز جاری کردیے گئے ہیں۔

سندھ کچی آبادی اتھارٹی نے پہلے مرحلے میں راجپوت کالونی، عیسیٰ نگری، ویلفیئر کالونی میں غیر قانونی بنائی گئی عمارات کو نوٹس جاری کیے ہیں۔

ڈائریکٹر کچی آبادی عبدالغنی جوکھیو نے بتایا کہاپر گزری، لوئر گزری، سلطان آباد، شاہ رسول کالونی، ہزارہ کالونی میں بنی غیر قانونی عمارتیں دوسرے مرحلے میں گرائی جائیں گی۔

اسی سے متعلق:  کچی آبادیوں‌ میں قائم غیرقانونی تعمیرات مسمار کرنے کا فیصلہ

کراچی کی 100 سے زائد کچی آبادیوں میں غیر قانونی عمارتیں ہیں، ڈائریکٹر کچی آبادی

ڈائریکٹر کچی آبادی کے مطابق کراچی کی 100 سے زائد کچی آبادیوں میں غیر قانونی عمارتیں بنائی گئی ہیں جبکہ کچی آبادیوں میں قانون کے تحت ایک سے دو منزلہ عمارت بنانے کی اجازت ہے۔

ان کا کہنا تھا کہ قبضہ مافیا بلڈرز نے کچی آبادیوں میں قبضے کرکے غیر قانونی عمارات بنائی ہیں، کراچی کی کچی آبادیوں میں جتنی بھی غیر قانونی عمارات بنائی گئی ہیں، انہیں مسمار کرنے کے لیے خصوصی سیل قائم کردیا گیا ہے، کچی آبادیوں میں بلند ترین عمارات بنانا غیر قانونی ہیں۔