کراچی(18 اپریل 2026): کراچی پولیس نے شہر کے مختلف علاقوں میں کارروائی کرتے ہوئے غیر ملکی کرنسی کی اسمگلنگ کی کوشش ناکام بنا دی اور کروڑوں ایرانی ریال برآمد کر کے ایک خاتون سمیت تین ملزمان کو گرفتار کر لیا ہے۔
تفصیلات کے مطابق پہلی کارروائی موچکو چیک پوسٹ پر اسنیپ چیکنگ کے دوران کی گئی، جہاں پولیس نے ایک مرد اور ایک خاتون کو حراست میں لے لیا، ملزمان کے قبضے سے 152 کروڑ 49 لاکھ 50 ہزار ایرانی ریال برآمد ہوئے۔
دوسری کارروائی سائٹ بی کے علاقے میں عمل میں لائی گئی، جہاں ایک مسافر کے قبضے سے 149 کروڑ ایرانی ریال برآمد کر کے اسے گرفتار کر لیا گیا۔
پولیس حکام کا کہنا ہے کہ گرفتار کیے گئے تینوں ملزمان بلوچستان سے کراچی پہنچے تھے۔ پولیس نے ضابطے کی کارروائی مکمل کرنے کے بعد زیر حراست ملزمان اور برآمد شدہ خطیر رقم کو مزید تحقیقات کے لیے وفاقی تحقیقاتی ادارے (ایف آئی اے) کے حوالے کر دیا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں