The news is by your side.

Advertisement

کراچی، نجی اسکول کے سوئمنگ پول میں طالب علم ڈوب کر جاں بحق

کراچی: شہر قائد کے نجی اسکول کے سوئمنگ پول میں طالب علم ڈوب کر جاں بحق ہوگیا۔

تفصیلات کے مطابق کراچی کے نجی اسکول کا سوئمنگ پول ننھے طالب علم کی زندگی نگل گیا، حادثہ پی آئی ڈی سی کے قریب واقع کیمپس میں پیش آیا، 11 سالہ طالب علم عثمان چھٹی جماعت کا طالب علم تھا۔

رپورٹ کے مطابق طالب علم عثمان کی لاش ساؤتھ سٹی اسپتال منتقل کردی گئی۔

پولیس نے نجی اسکول کے 2 سوئمنگ ٹرینرز کو حراست میں لے لیا، زیر حراست ٹرینر کے مطابق عثمان سوئمنگ چیمپئن تھا۔

زیر حراست ٹرینر کا کہنا ہے کہ عثمان نے ڈائیو ماری اور 5 سے 6 سیکنڈ تک اوپر نہیں آیا، سوئمنگ پول میں جاکر عثمان کو پانی سے اوپر لے کر آئے اور فوری طور پر نجی اسپتال منتقل کیا۔

نمائندہ اے آر وائی نیوز کے مطابق واقعے کے بعد اسکول انتظامیہ غائب ہوگئی اور سیکیورٹی شفٹ تبدیل کردی گئی، سیکیورٹی انچارج کا کہنا تھا کہ میری ڈیوٹی شام کی شفٹ میں ہے دوپہر میں کیا ہوا مجھے کچھ معلوم نہیں ہے۔

ایڈیشنل پولیس سرجن کا کہنا ہے کہ بچے کا مکمل پوسٹ مارٹم کیا ہے، بچے کے جسم پر چوٹ کا کوئی نشان نہیں ہے، موت پھیپھڑوں میں پانی بھرجانے کے باعث ہوئی ہے۔

طالب علم عثمان کے چچا کا کہنا ہے کہ ساڑھے تین بجے مجھے عثمان کی والدہ کا فون آیا تھا کہ عثمان کی اسکول میں طبیعت خراب ہوگئی ہے۔

عثمان کے چچا کا کہنا ہے کہ بچے کو اسپتال لے جایا گیا جہاں جاکر پتا چلا کہ وہ ڈوب کر جاں بحق ہوگیا ہے۔

Comments

comments

یہ بھی پڑھیں