کراچی: شہر قائد میں پولیس اہلکاروں پر ممکنہ حملے کے خطرے کے پیش نظر نئی ایس او پی تیار کرلی گئی۔
اے آر وائی نیوز کی رپورٹ کے مطابق کراچی میں پولیس اہلکاروں پر ممکنہ حملے کے خطرے کے پیش نظر نئی ایس او پی تیار کرلی گئی جس کے مطابق پولیس افسران و اہلکار ڈیوٹی پر آتے اور جاتے وقت وردی، جوتے نہیں پہنیں گے۔
ایس او پی کے مطابق پولیس اہلکار ڈیوٹی پر آتے یا جاتے ہوئے مختلف راستوں کا انتخاب کریں، ڈیوٹی ختم ہونے کے بعد بھی وردی نہ پہنی جائے۔
پولیس حکام کا کہنا ہے کہ ایس او پر عملدرآمد نہ کرنے پر محکمہ جاتی کارروائی عمل میں لائی جائے گی، نئی ایس او پی گزشتہ روز پولیس اہلکار کی شہادت کے بعد جاری کی گئی ہے۔
واضح رہے کہ گزشتہ روز کراچی کے علاقے محمود آباد میں نامعلوم موٹر سائیکل سوار ملزمان کی فائرنگ سے پولیس اہلکار نعمان جاں بحق ہوگیا تھا۔
ایس ایس پی ایسٹ کا کہنا تھا کہ مقتول اہلکار ون فائیو پولیس مددگار ساؤتھ میں تعینات تھا، مقتول وردی میں دفتر جارہا تھا۔
ایس ایس پی ایسٹ کا کہنا تھا کہ جائے وقوعہ سے تیس بور کے گولیوں کے تین خول ملے ہیں، پولیس حکام نے شواہد اکٹھے کرکے تحقیقات کا آغاز کردیا ہے۔
