کراچی : سپریم کورٹ رجسٹری میں سوشل میڈیا پر عدلیہ اور اس کے فیصلوں پر ہونے والی تنقید پر اظہار برہمی، چیئرمین پی ٹی اے کے قابل ضمانت گرفتاری کے وارنٹ جاری کردییے۔
تفصیلات کے مطابق سپریم کورٹ رجسٹری میں سوشل میڈیا پر عدلیہ کے فیصلوں پر تنقید کرنے کے حوالے سے کیس کی سماعت کی گئی، جس میں چیئرمین پیمرا ابصار عالم پیش ہوئے،عدالت نے چیئرمین پی ٹی اے کی غیر موجودگی پر اظہار برہمی کرتے ہوئے اُن کے بارے میں دریافت کیا ، جس پر چیئرمین کے وکلاء کی جانب سے عدالت کو آگاہ کیا گیا کہ ’’وہ اسلام آباد میں کچھ پروگراموں میں مصروف ہیں۔
عدالت نے چیئرمین پیمرا ابصار عالم سے استفتار کرتے ہوئے کہا کہ ’’ایسے چینلز کے لائسنس کو معطل کیوں نہیں کیا گیا جو عدالتی فیصلوں پر تنقید کرتے ہیں، ابصار عالم نے عدالت کو جواب دیا کہ قانون کے تحت جو کارروائی ممکن تھی وہ عمل میں لائی گئی۔
عدالت نے اظہار برہمی کرتے ہوئے چیئرمین پی ٹی اے کے قابلِ ضمانت وارنٹ گرفتاری جاری کرتے ہوئے پولیس کو حکم دیا کہ اگلی سماعت پر اُن کو ضرور پیش کیا جائے، قبل ازیں سپریم کورٹ رجسٹری میں جسٹس امیر ہانی اسلم نے کراچی بدامنی کیس کی سماعت کے دوران پولیس کی جانب سے اویس شاہ اغواء کیس پر پیش کی گئی رپورٹ کو مسترد کرتے ہوئے آئی جی سندھ اور سیکریٹری داخلہ کو متعلقہ افراد کے خلاف کارروئی عمل میں لانے کی ہدایت جاری کیں۔
