کراچی : محکمہ موسمیات نے کراچی والوں کو بھی خوشخبری سنا دی، آئندہ تین روز تک موسم ابرآلود اور ہلکی بارش کا امکان ہے جبکہ پنجاب کے مختلف شہروں میں بارش سے گرمی کا زور ٹوٹ گیا۔
محکمہ موسمیات کا کہنا تھا کہ کراچی میں آئندہ تین روز تک شہر میں موسم ابرآلود رہے گا، بعض علاقوں میں ہلکی بارش کا بھی امکان ہے، ٹھٹھہ میں بھی موسم نے رنگ بدل لیا، ساحلی علاقوں میں تیز طوفانی ہواؤں نے گرمی کا زور توڑ دیا ہے۔
محکمہ موسمیات کا کہنا ہے کہ تین روز سے جاری گرمی کی شدید لہر آج بھی اندرون سندھ، بلوچستان اور جنوبی پنجاب کے بیشتر میدانی علاقوں میں برقرار رہے گی، چوبیس گھنٹے کے دوران جیکب آباد ، دادو،تربت،نواب شاہ میں انتالیس ڈگری سینٹی گریڈ تک ریکارڈ کیا گیا۔
ملک کے مختلف شہروں میں موسلادھار بارش سے شدید گرمی کا زور ٹوٹ گیا، جہلم، مری، سیالکوٹ، لاہور، اسلام آباد، راولپنڈی، گوجرانوالہ سمیت آزاد کشمیر کے علاقوں میں بادل برسے تو روزے داروں میں خوشی کی لہر دوڑ گئیں۔
