The news is by your side.

کراچی میں تاجر کا سفاکانہ قتل : بیوی اور اس کا بھائی ملوث نکلا

کراچی : شہر قائد میں تاجر کے قتل میں ملوث بیوی اور اس کے بھائی کو گرفتار کرلیا گیا ، 26جولائی کو رضوان سوریا نامی تاجر کو گھر میں قتل کیا گیا تھا۔

تفصیلات کے مطابق کراچی میں شرف آباد کے علاقے میں سفاکانہ طریقے سے قتل ہونے والے تاجر رضوان سوریا کے قتل میں ملوث سگے بہن بھائی کو گرفتار کرلیا ہے۔

نیوٹاؤن پولیس کے ایس ایچ او زبیر اورایس آئی او نے انتہائی مہارت سے سی سی ٹی وی فوٹیجز اور ٹیکنیکل طریقہ کار سے ملزمان کو گرفتار کیا۔

ایس ایس پی ایسٹ عبدالرحیم شیرازی نے بتایا کہ گرفتار خاتون نورین مقتول رضوان سوریا کی بیوی ہے جبکہ قتل کی منصوبہ بندی خاتون کے پرانے دوست حسن نے کی تھی، جسے مقتول رضوان سوریا کا تقریبا ڈیڑھ کروڑ روپے قرضہ دینا تھا۔

ایس ایچ او نیوٹاون محمد زبیر اور ایس آئی او نے 26 جولائی کو قتل ہونے والے اس کیس پر دن رات کام کیا اور کامیابی حاصل کی۔

پولیس کو حاصل سی سی ٹی وی فوٹیجز میں کینٹ اسٹیشن کے ہوٹل میں ٹہرے قاتل عمران اور سجاد کو قتل کے لیے نکلتے دیکھا جاسکتا ہے، ملزم کے ہاتھ میں ہرے کلر کا تھیلا بھی تھا جس میں آلہ قتل موجود تھا جو کے گھر کے اندر داخل ہوتے اور واپس نکلتے بھی موجود تھا۔

ایس ایس پی ایسٹ کے مطابق قتل میں ملوث ملزمان گوجرانوالہ فرار ہوگئے تھے، جس کے بعد پولیس نے چھاپہ مار کارروائیاں کرتے ہوئے دو گرفتاریاں کی جبکہ مفرورملزمان سجاد اور مرکزی ملزم حسن کی گرفتاری کے لیے چھاپہ مار کارروائیاں جاری ہیں اور ان کو بھی جلد گرفتار کرلیا جائے گا۔

Comments

یہ بھی پڑھیں