لیاری میں مقابلہ، مطلوب ملزم غفار ذکری ہلاک، 3 پولیس اہلکار زخمی Ghafar-Zakri
The news is by your side.

Advertisement

لیاری میں مقابلہ، مطلوب ملزم غفار ذکری ہلاک، 3 پولیس اہلکار زخمی

کراچی : شہر قائد کے علاقے لیاری کے علی محمد محلہ میں پولیس مقابلے دوران گینگ وار کا اہم ترین کارندہ غفار ذکری ہلاک ہوگیا جبکہ فائرنگ تبادلے میں تین پولیس اہلکار زخمی ہوئے ہیں۔

تفصیلات کے مطابق کراچی کے علاقے لیاری کے علی محمد محلہ میں لیاری گینگ وار کا اہم ملزم پولیس مقابلے کے دوران اپنے ساتھی اور بیٹے سمیت ہلاک ہوگیا جبکہ فائرنگ کے تبادلے میں سب انسپیکٹر اور ایک اہلکار شدید زخمی ہوگئے۔

ڈی آئی جی ساؤتھ جاوید عالم کا کہنا ہے کہ گولیوں کی زد میں آکر 3 سال کا بچہ بھی جاں بحق ہوا ہے۔

ڈی آئی جی ساؤتھ کا کہنا ہے کہ لیاری کے علی محمد محلہ میں خفیہ اداروں کی نشاندہی پر سیکیورٹی اداروں نے سرچ آپریشن کیا تھا سرچ آپریشن کے دوران گینگ وار ملزمان نے پولیس پارٹی پر فائرنگ شروع کردی اور دستی بم سے بھی حملہ کیا۔

ڈی جی آئی جاوید عالم کے مطابق پولیس مقابلہ 2 گھنٹے سے زائد جاری رہا، جس کے بعد کے لیاری گینگ وار کا اہم ترین ملزم غفار ذکری اپنے ساتھی چھوٹا زائد سمیت مارا گیا جبکہ دو ساتھی گرفتار کیے ہیں۔

جاوید عالم نے مزید بتایا کہ فائرنگ کی زد میں آکر ایک سب انسپیکٹر سمیت تین اہلکار زخمی بھی ہوئے جنہیں اسپتال منتقل کردیا گیا تھا تاہم سب انسپیکٹر کی حالت تشویش ناک ہے۔

پولیس چیف ڈاکٹر امیر شیخ کے مطابق ہلاک ملزمان سے بھاری تعداد میں اسلحہ بھی برآمد ہوا، جس میں سب مشین گنز (ایس ایم جی)، دستی بم، آوان بم، درجنوں گولیاں اور کئی میگزینز شامل ہیں۔

پولیس ترجمان کا کہنا تھا کہ غفار ذکری کے خلاف آپریشن میں 15 سے زائد پولیس موبائلوں نے حصہ لیا، پولیس اور رینجرز کی بھاری نفری نے مقابلے کے بعد علاقے کو گھیرے میں لے رکھا ہے۔

پولیس کا کہنا ہے کہ ہلاک ملزم غفار ذکری کے خلاف قتل اور اقدام قتل، بھتے، اغوا برائے تاوان سمیت کئی وارداتوں میں مطلوب تھا، غفار ذکری کے خلاف شہر کے مختلف تھانوں میں سنگین نوعیت کے سو سے زائد مقدمات درج ہیں۔

پولیس کا کہنا ہے کہ غفار ذکری لیاری میں دہشت کی علامت بنا ہوا تھا، اس کے سر کی قیمت پچیس لاکھ روپے مقرر کی گئی تھی۔

Comments

comments

یہ بھی پڑھیں