The news is by your side.

Advertisement

سمندری طوفان ’وایو‘ کے اثرات، کراچی میں پارہ 41 ڈگری تک پہنچ گیا

کراچی : بحیرہ عرب میں سمندری طوفان ’وایو‘ کے باعث کراچی میں شدید گرمی،درجہ حرات اکتالیس ڈگری سینٹی گریڈ تک پہنچ گیا، حبس سے شہریوں کا برا حال ہے، گرمی کی شدت تین روزتک برقراررہے گی۔

تفصیلات کے مطابق کراچی میں بحیرۂ عرب میں آنے والے سمندری طوفان کے اثرات نظر آنے لگے، شہر شدید گرمی کی لپیٹ میں آگیا، سمندری ہوائیں رک گئیں اور پارہ 41 ڈگری تک جا پہنچا،  حبس سے شہریوں کا برا حال ہے۔

موسمیات نے کراچی میں پہلے ہی گرمی کا الرٹ جاری کررکھا ہے، جس کے مطابق سمندری ہواؤں کے رخ میں تبدیلی سے گرمی میں اضافہ ہورہاہے، جو مسلسل تین روز جاری رہے گا۔

سمندری طوفان کراچی سے 443کلومیٹر جنوب مشرق میں موجود ہے اور طوفان 12کلومیٹرفی گھنٹہ کی رفتار سے شمال مغرب میں بڑھ رہا ہے۔

طبی ماہرین نے مشورہ دیا ہے ، شہری احتیاط کریں، بلا ضرورت گھروں سے نہ نکلیں، پانی کا زیادہ سے زیادہ استعمال کریں، گھر یا دفتر سے نکلتے وقت سر پرگیلا تو لیا اور چھتری ساتھ رکھیں۔

دوسری جانب محکمہ موسمیات نے آئندہ چوبیس گھنٹوں میں کراچی، کوئٹہ، لاہور، اسلام آباد، پشاور سمیت ملک کے بیشترعلاقوں میں موسم گرم اور خشک رہنے کی پیشگوئی کی ہے۔

طوفان وایو کے باعث ٹھٹھہ ،بدین سمیت سندھ کےبعض علاقوں میں بارش کی پیش گوئی کی ہے اور ماہی گیروں کو سمندرمیں جانےسے روک دیاگیا، سندھ کے ساحلی علاقوں میں ایمرجنسی نافذ کردی گئی ہے۔

Comments

comments

یہ بھی پڑھیں