ممبئی: بھارتی ریاست مہاراشتر میں ایک اور کشمیری طالب علم پر بہیمانہ تشدد کا واقعہ سامنے آیا ہے، شیو سینا کے چارغنڈوں نے کشمیری نوجوان کو ’جے ہند‘ کے نعرے لگانے پرمجبور کیا۔
بھارتی میڈیا کے مطابق یہ واقع دو روز قبل یعنی بدھ کے روز رات دس بجے کے قریب واگھا پور روڈ پر پیش آیا، جہاں کشمیری طالب علم کی رہائش گاہ کے قریب ہی شیو سینا کی نوجوان تنظیم یووا سینا کے چار غنڈوں نے کشمیری طالب علم کو گھیر کر اس پر تشدد کیا ۔
بدمعاشوں نے اپنی غنڈہ گردی کی انتہا کرتے ہوئے ویڈیو سوشل میڈیا پر اپ لوڈ کی جس کے بعد وہ لمحوں میں وائرل ہوگئی۔ واقعے کا مقدیواتمال پولیس اسٹیشن میں درج کیا گیا ہے۔
ویڈیو میں دیکھا جاسکتا ہے کہ بھارتی غنڈے نے کشمیری طالب علم سے پہلے نام پوچھا ، پھر کشمیر کا سن کر اسے تھپڑ رسید کردیا۔ اس کے بعد مسلسل سوال کرکے طالب علم کو تشدد کا نشانہ بناتا رہا۔ بھارتی غنڈہ بضد تھا کہ کشمیری نوجوان کا کوئی نہ کوئی رشتے دار پلوامہ حملے میں ضرور شریک ہوگا۔
کشمیر ی نوجوان پر تشدد کرتے ہوئے بھارتی غنڈے کے منہ سے وہ بات بھی نکل گئی جسے تسلیم کرنے سے پورا بھارت انکاری ہے، غنڈے نے تشدد کرتےہوئے کہا کہ ’’تم اسی فیصد کشمیری پاکستان سے پیارکرتے ہو‘‘۔
حملہ آوروں نے نوجوان کو مجبور کیا کہ وہ ’جے ہند‘ ، ’بھارت ماتا کی جے‘ اور ’وندے ماترم‘ جیسے ریاستی نعرے لگا کر دکھائے۔ ویڈیو میں تشدد کا شکار ہونے والا طالب علم یواتمال کے پٹیل کالج آف فزیکل ایجوکیشن کا طالب علم ہے ، پولیس کا کہنا ہے کہ متاثرہ کشمیری طالب علم کی حفاظت کی جائے گی۔
یواتمال پولیس کے ایس پی ایم راج کمار نے انتہائی بھولے پن کا مظاہرہ کرتے ہوئے میڈیا کو بتایا کہ مقدمہ درج کرلیا گیا ہے اور ویڈیو کی مدد سے مجرم کی شناخت کی کوشش کی جارہی ہے۔ حالانکہ بھارتی میڈیا نے مجرم کا چہرہ واضح کرکے ساری دنیا کو دکھایا ہے لیکن خود کو ٹیکنالوجی کی دنیا میں ایکسپرٹ سمجھنے والا بھارت واقعے کے مرکزی مجرم کو گرفتار کرنے میں ناکام ہے۔
