لندن (16 مارچ 2026): برطانوی وزیر اعظم کیئر اسٹارمر نے ایک بار پھر واضح کر دیا ہے کہ وہ ایران کے خلاف کسی جنگ کا حصہ نہیں بنیں گے۔
تیل کی بڑھتی ہوئی قیمتوں سے متاثر لوگوں کی مدد کے لیے 53 ملین پاؤنڈ کے پیکج کا اعلان کرتے ہوئے کیئر اسٹارمر نے کہا جنگ کی وجہ سے تیل اور گیس کی قیمتیں بڑھی ہیں اور مزید بڑھ رہی ہیں، ہم مشرق وسطیٰ میں جنگ کو مزید نہیں پھیلنے دیں گے، تین ہفتے کے بعد 3 ماہ کے لیے برطانیہ میں تیل کی قیمتیں فکس کر دیں گے۔
ٹین ڈاؤننگ اسٹریٹ میں پریس کانفرنس سے خطاب کرتے ہوئے برطانوی وزیر اعظم نے کہا آبنائے ہرمز کو دوبارہ کھولنا کوئی آسان ٹاسک نہیں، لیکن وہ ایک قابل عمل منصوبے پر سمندری آمد و رفت کی بحالی کے لیے اتحادیوں کے ساتھ مل کر کام کر رہے ہیں لیکن یہ نیٹو مشن نہیں ہوگا، مسئلے کے تیز حل کے لیے اقدامات کریں گے، جنگ کے بعد ہمیں ایران کے ساتھ معاہدے کی ضرورت ہوگی۔
اسرائیل ایران جنگ سے متعلق تمام خبریں یہاں پڑھیں
انھوں نے کہا تیل کی ترسیل پر اخراجات کم کرنے کا واحد حل جنگ کا خاتمہ ہے، تیل کمپنیوں کو جنگ کی وجہ سے زیادہ منافع کمانے کی اجازت نہیں دی جا سکتی، جنگ کو روسی صدر کے لیے بھی فائدہ مند موقع نہیں بننے دیا جا سکتا۔
کیئر اسٹارمر نے کہا ایران کے خلاف جنگ میں شامل نہ ہونے پر سخت تنقید کا نشانہ بنایا گیا لیکن میرے لیے برطانیہ کے مفادات اہم ہیں، میں اصولوں پر قائم رہوں گا، چاہے جتنا بھی دباؤ آئے، برطانوی عوام کے مفاد کی حفاظت کرتا رہوں گا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں