کراچی (13 مئی 2026): خوبصورت ثقافت رکھنے والے کیلاش قبیلے کی خاتون کرکٹر سائرہ جبیں نے پاکستان ٹیم کی جانب سے ڈیبیو کر لیا۔
پاکستان ویمن کرکٹ ٹیم میں پہلی بار وادی کیلاش سے تعلق رکھنے والی کرکٹر سائرہ جبیں نے ڈیبیو کیا۔ انہوں نے زمبابوے کے خلاف پہلے ویمنز ٹی ٹوئنٹی میچ میں پاکستان کی جانب سے اپنے انٹرنیشنل کیریئر کا آغاز کیا۔
25 سالہ سائرہ جبیں صوبہ خیبر پختونخوا کے ضلع چترال میں واقع ہندو کوہ کش کے معروف کیلاش قبیلے سے تعلق رکھتی ہیں۔
لاہور کے کینرڈ کالج میں زیر تعلیم بیٹنگ آل راؤنڈر سائرہ جبیں ڈومیسٹک ویمن کرکٹ میں اسٹرائیکرز کی جانب سے بہترین کارکردگی کا مظاہرہ کر چکی ہیں۔ تاہم، وہ اپنے پہلے انٹرنیشنل میچ میں صرف پانچ رنز ہی بنا سکیں۔
دوسری جانب سائرہ کے قومی ٹیم میں منتخب ہونے پر ان کے اہل خانہ نے بہت خوشی کا اظہار کیا ہے۔
گاؤں سے ویڈیو لنک پر سائرہ کی والدہ نے اپنی بیٹی کے قومی ٹیم میں منتخب ہونے پر اللہ تعالیٰ کا لاکھ لاکھ شکر ادا کرتے ہوئے کہا کہ مجھے بہت خوشی ہے کہ میری بیٹی پاکستان کرکٹ ٹیم میں منتخب ہوئی، وہ بہت آگے تک جائے گی۔
سائرہ کے بھائیوں نے بھی خوشی کا اظہار کرتے ہوئے کہا کہ ہم اس دن کا بے چینی سے انتظار کر رہے تھے۔ وہ پاکستان کا نام روشن کرے گی، ہم سب پی سی بی کا شکریہ ادا کرتے ہیں۔
زندگی کے اس یادگار لمحے پر سائرہ جبیں نے کہا کہ آج میں جو یہاں ہوں، اس میں میری فیملی کا بہت بڑا کردار ہے۔ والدین، بھائی بہنوں نے میرے خواب کو حقیقت بنایا، ان کی سپورٹ کے بغیر میں کچھ بھی نہیں کر سکتی تھی۔
انہوں نے کہا کہ یہ میرے لیے بہت خاص لمحہ ہے، میرے لیے قومی ٹیم میں منتخب ہونا سرپرائز تھا۔
Special messages pour in for Saira Jabeen from family and friends in Kalash ahead of her international debut ❤️
🎥 Watch the emotional moments as the ‘Little Champion’ reflects on the love and support behind her journey✨#JeetKaSafar | #PAKWvZIMW | #BackOurGirls pic.twitter.com/NuiSf8YC5c
— Pakistan Cricket (@TheRealPCB) May 13, 2026
ریحان خان کو کوچہٌ صحافت میں 25 سال ہوچکے ہیں اور ا ن دنوں اے آر وائی نیوز سے وابستہ ہیں۔ملکی سیاست، معاشرتی مسائل اور اسپورٹس پر اظہار خیال کرتے ہیں۔ قارئین اپنی رائے اور تجاویز کے لیے ای میل [email protected] پر بھی رابطہ کر سکتے ہیں۔