کراچی: کے الیکٹرک کی من مانیاں جاری ہیں، وفاقی حکومت کے احکامات بھی ہوا میں اڑا دیے، 9 اور 10 محرم کو بھی شیڈول کے مطابق شہر میں لوڈ شیڈنگ کی جا رہی ہے۔
تفصیلات کے مطابق کراچی کے مختلف علاقوں میں رات کے اوقات میں 2 سے 3 گھنٹے کی کئی بار لوڈ شیڈنگ ہو رہی ہے، مستثنیٰ علاقوں میں بھی بجلی غائب رہنا معمول بن گیا۔
وفاقی حکومت کے احکامات کے برعکس کے الیکٹرک 9 اور 10 محرم کو بھی شیڈول کے مطابق شہر میں لوڈ شیڈنگ کر رہی ہے، مستثنیٰ علاقوں میں بھی رات کوایک سے 2 گھنٹے کی لوڈ شیڈنگ جاری ہے۔
نشریات کی بندش: اے آر وائی کی لائیو ٹرانسمیشن یہاں دیکھیں
ضلع وسطی اور ضلع شرقی میں سب سے زیادہ لوڈ شیڈنگ کی جا رہی ہے، نارتھ کراچی، شادمان ٹاؤن، سر سید ٹاؤن، خواجہ اجمیر نگری، لیاقت آباد، گلبہار، خاموش کالونی، پہاڑ گنج، اور حسرت موہانی کالونی میں بجلی بند ہے۔
ایف بی ایریا، موسیٰ کالونی، غریب آباد، کریم آباد، عزیز آباد، گلشن اقبال، گلستان جوہر، پی ای سی ایچ ایس سوسائٹی، پرانی سبزی منڈی، دھوراجی کالونی، کے ڈی اے اسکیم ون آفیسرز ہاؤسنگ سوسائٹی میں بھی بجلی کی فراہمی معطل رہی۔
اسکاٹ کالونی، ریلوے سٹی کینٹ کالونی، اعظم بستی محمود آباد، کشمیر کالونی، اختر کالونی، عباس ٹاؤن، رضویہ سوسائٹی، انچولی، لانڈھی، کورنگی، اورنگی گلشن ظہور، بلدیہ اتحاد ٹاؤن، منگھو پیر، قصبہ، پاک کالونی، کیماڑی بھی شدید متاثرہ علاقوں میں شامل ہیں۔
مشرف کالونی، نصرت بھٹو کالونی، میٹروول سائٹ، گلشن حدید، گلشن معمار، احسن آباد، کوئٹہ ٹاؤن، صفورہ گوٹھ، بندھانی کالونی میں بھی لوڈ شیڈنگ کا سلسلہ جاری ہے۔
ترجمان کے الیکٹرک کے مطابق ایندھن کی خریداری میں دشواری اور ایندھن کی فراہمی میں کمی سے پیداواری صلاحیت متاثر ہورہی ہے، جس کے باعث کچھ علاقوں میں عارضی طور پرلوڈ مینجمنٹ کرنی پڑتی ہے۔ اس کے باوجود صارفین کو زیادہ سے زیادہ ریلیف دینے کے لیے اقدامات کررہے ہیں۔بلوں کی عدم ادائیگی اور ٹیکنیکل وجوہ کی بنیاد پر بجلی کی بندش کو لوڈشیڈنگ سے تشبیہ دینا درست نہیں۔ نیشنل پاور پالیسی اور بجلی چوری و نقصانات کی مناسبت سے لوڈشیدنگ کا دورانیہ متعین ہے، جب کہ نقصانات کی شرح میں کمی لوڈشیڈنگ کے دورانیے میں کمی یا خاتمے کا سبب بنتی ہے۔
شہر کو بجلی کی فراہمی فی الحال 30 جون 2022 کو اعلان کردہ شیڈول کے مطابق جاری ہے جو کے الیکٹرک کی ویب سائٹ پر بھی دستیاب ہے۔
کے الیکٹرک کے ترجمان نے مزید بارش کی پیش گوئی کے تناظر میں شہریوں سے درخواست کی کہ وہ احتیاطی تدابیر پر عمل کرتے رہیں اور بجلی کی تمام تنصیبات سے محفوظ فاصلہ رکھیں۔ بارش کے پانی میں رکھے ہوئے بجلی کے آلات جیسے کہ پانی کی موٹر وغیرہ کے استعمال سے اجتناب کریں۔
صارفین کے الیکٹرک سے کسی بھی خطرے یا بجلی کی شکایت 24 گھنٹے کسی بھی وقت کال سینٹر 118، ایس ایم ایس سروس 8119، کے ای لائیو اَیپ، سوشل میڈیا پلیٹ فارم اور کے الیکٹرک کے وائس اَیپ سیلف سروس پورٹل کے ذریعے کرسکتے ہیں۔
