کینسر سے لڑتے ہوئے اداکارہ کیلی پریسٹن زندگی کی بازی ہار گئیں۔ ہالی وڈ کی درجنوں بلاک بسٹر فلموں میں اداکاری کے جوہر دکھانے والی کیلی پریسٹن 57 برس کی تھیں۔
اس اداکارہ کا تعلق امریکا سے تھا۔ 1962 میں پیدا ہونے والی کیلی پریسٹن کا بچپن عراق میں گزرا اور لڑکپن کے دن آسٹریلیا میں گزارے جہاں ایک فیشن فوٹو گرافر نے انھیں چند کمرشلز میں کام کرنے کا موقع دیا اور یوں وہ شوبزنس کی دنیا میں قدم رکھنے میں کام یاب ہوئیں۔
کیلی پریسٹن نے مشہور اداکار جان ٹراولٹا سے شادی کی تھی اور ان کی یہ رفاقت تیس برسوں پر محیط ہے۔ جان ٹراولٹا نے اپنی رفیقِ حیات کے معالجین اور ان کی دیکھ بھال کرنے والے طبی عملے کا شکریہ ادا کیا ہے۔
اداکارہ دو سال سے چھاتی کے سرطان کا مقابلہ کررہی تھیں اور ان کا علاج جاری تھا۔ تاہم ان کی اس بیماری کا ان کے مداحوں کو علم نہیں تھا۔
کیلی پریسٹن کی مشہور فلموں میں ’ٹوونز‘، ’فرام ڈسک ٹل ڈان‘، ’جیری مک گوائر‘ اور ’کیٹ ان اے ہیٹ‘ شامل ہیں۔ انھوں نے ماڈلنگ اور مختلف کمرشلز میں بھی کام کیا۔
اداکارہ نے اپنے شوہر اور فلم ایکٹر جان ٹراولٹا کے ساتھ ’بیٹل فیلڈ ارتھ‘ اور ’گاٹی‘ میں کام کیا۔
خاندانی ذرایع کے مطابق ان کی موت اتوار کی صبح ہوئی۔
کیلی کی موت کی خبر عام ہونے پر ہالی وڈ کے نام ور فن کاروں اور شوبز کی دنیا کی مشہور شخصیات نے افسوس کا اظہار کرتے ہوئے انھیں خراج تحسین پیش کیا ہے۔
