سنجے دت کی مشہورِ زمانہ فلم ’کھل نائیک‘ کے سیکوئل کے حوالے سے ڈائریکٹر سبھاش گھائی نے تصدیق کی ہے کہ وہ 30 سال قبل ریلیز ہونے والی ہِٹ فلم کے سیکوئل کی اسکرپٹ پر پچھلے تین سال سے کام جاری رکھے ہوئے ہیں۔
گذشتہ کئی دنوں سے اس فلم کے سیکوئل کے حوالے سے افواہیں گردش کر رہی تھیں، سنجو بابا، مادھوری اور جیکی شروف کی فلم ’کھل نائیک‘ 1993 میں ریلیز ہوئی تھی اور اس فلم کو آج تک کلاسِک کا درجہ حاصل ہے۔
ایک انسٹاگرام پوسٹ میں فلم کے ہدایت کار سبھاش گھائی کا کہنا تھا کہ ’میڈیا میں آنے والی اطلاعات کے برعکس میں یہ وضاحت دینا چاہوں گا کہ مُکتا آرٹس نے کھل نائیک 2 کے لیے کسی اداکار سے معاہدہ نہیں کیا۔‘
سبھاش گھائی کا مزید کہنا تھا کہ ’ہم گذشتہ تین سال سے اس فلم کے سکرپٹ پر کام کر رہے ہیں لیکن اس فلم کی فوری شوٹنگ شروع کرنے کا کوئی منصوبہ نہیں۔‘انہوں نے کہا کہ اگر ایسا کچھ ہوا تو ضرور آگاہ کیا جائے گا۔
انڈین ہدایت کار کا ’کھل نائیک‘ فلم کی ریلیز کے 30 سال مکمل ہونے پر کہنا تھا کہ فلم کی پوری کاسٹ 4 ستمبر کو ممبئی میں جمع ہوگی اور تین دہائیاں مکمل ہونے پر جشن کا اہتمام ہوگا۔
فلم کے مرکزی کردار سنجے دت نے رواں سال جون میں اپنی انسٹاگرام پوسٹ میں ساتھی اداکاروں اور سبھاش گھائی کو ’کھل نائیک‘ فلم کے 30 سال پورے ہونے پر مبارک باد دی تھی۔
سنجے دت کا کہنا تھا کہ 30بیت گئے ہیں مگر آج بھی ایسا محسوس ہوتا ہے کہ جیسے یہ فلم کل ہی بنائی گئی ہے۔