site
stats
پاکستان

عمران خان بڑے ہوجائیں، جمہوریت کو بہت نقصان پہنچا دیا، سعد رفیق

لاہور : پاکستان مسلم لیگ کے مرکزی رہنما اور وفاقی وزیر ریلوے خواجہ سعد رفیق نے کہا ہے کہ عمران خان بڑے ہوجائیں، آپ نے جمہوریت کو بہت نقصان پہنچا دیا، اس وقت آصف زرداری کا رویہ بہت پراسرار ہے، حدیبیہ پیپرملز کیس کا فیصلہ کئی سال پہلے ہوچکا ہے۔

ان خیالات کا اظہار انہوں نے لاہور میں میڈیا سے گفتگو کرتے ہوئے کیا، وفاقی وزیر نے کہا کہ ملک میں جمہوری نظام کو چلنا چاہیے، پاکستان میں ووٹ کے ذریعے ہی تبدیلی آنی چاہیے، بہت سی باتیں ہم کہتے نہیں دل میں رکھتےہیں، گزشتہ چار سال سے کچھ لوگ جمہوری نظام کیخلاف کام کررہےہیں۔

چیئرمین پی ٹی آئی عمران خان پر تنقید کرتے ہوئے ان کا کہنا تھا کہ عمران خان اور ان کی جماعت جمہوریت کیخلاف استعمال ہوئے، عمران کے مشیر ان کو تباہی کا راستہ دکھا رہےہیں، خدشہ ہے کہ پی ٹی آئی قبل از وقت کے چکر میں الیکشن میں تاخیر نہ کرا دے۔

انہوں نے کہا کہ مخالفین اسمبلی تحلیل کرنے کا نہ سوچیں، عمران خان بڑے ہوجائیں، آپ نے جمہوریت کو بہت نقصان پہنچا دیا، عمران خان غیر سنجیدہ آدمی ہیں اور ہم سنجیدہ سیاست کررہے ہیں، انہوں نے سیاست میں گند ڈال کر جمہوری نظام کو بھی نقصان پہنچایا۔

سعد رفیق کا مزید کہنا تھا کہ ایم کیوایم پاکستان اور پی ایس پی کے جھگڑے سے ن لیگ کا کوئی تعلق نہیں، جھگڑے میں نئے پاکستان کا دعویٰ کرنے والی جماعت کارہنما ملوث نکلا۔

انہوں نے کہا کہ حدیبیہ پیپر ملز کیس کا فیصلہ کئی سال پہلے ہوچکا ہے، جج پر جج کے تقرر سے فیصلہ کرنے والے جج کی آزادی پر قدغن لگتی ہے۔

ان کا کہنا تھا کہ پیپلزپارٹی نئی حلقہ بندیوں کیلئے ترمیم میں رکاوٹ ہے، سینیٹ میں اکثریت نہ ہونے سے ن لیگ آئینی ترمیم نہیں کرسکتی، تمام سیاسی جماعتوں سے رابطے میں ہیں بات چیت چل رہی ہے۔

وفاقی وزیر نے کہا کہ اس وقت آصف زرداری کارویہ بہت پراسرار ہے، پیپلزپارٹی کو اگلےالیکشن میں مرکزمیں اپنا کوئی کردار نظر نہیں آرہا۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top