کراچی : وفاقی وزیر ریلوے خواجہ سعد رفیق نے فروری میں کراچی سے میر پور خاص اور بدین کے لیے مہران ایکسپریس سمیت ٹرین چلانے کا اعلان کردیا۔
تفصیلات کے مطابق وزیر ریلوے نے اہلیان کراچی کو خوشخبری سنادی، کراچی کے دورے کے موقع پر میڈیا سے گفتگو کرتے ہوئے انہوں نے اعلان کیا کہ سال 2018 کے دوسرے مہینے سے کراچی سے میر پور خاص اور بدین کے لیے مہران ایکسپریس سمیت خصوصی ٹرین چلائی جائے گی۔
ان کا کہنا تھا کہ محکمہ ریلوے کی تمام اراضی کا ریکارڈ کمپیوٹرائزڈ کرلیا گیا ہے، قبضہ مافیہ کے خلاف آپریشن جاری رہے گا۔
خواجہ سعد رفیق نے مزید کہا کہ ماضی میں ملک حادثے کا شکارہوا لیکن پالیسی سازوں نے اس سے کوئی سبق نہیں سیکھا، انہوں نے تمام تجربے کرکے دیکھ لیے لیکن انہیں کوئی کامیابی نہیں ملتی۔
وزیر ریلوے نے کہا کہ سیاسی جماعتوں اور اداروں میں بلوغت آئی ہے، امید ہے بلوغت کا عمل آہستہ آہستہ آگے بھی بڑھےگا۔
مزید پڑھیں: جہانگیر ترین کے نااہل ہونے پر خوشی نہیں ہوئی، سعد رفیق
ان کا کہنا تھا کہ الیکشن کی آمد آمد ہے سب نے اپنی اپنی صف بندیاں کرنی ہیں، ملک میں پہلے اینٹی بھٹو اور پرو بھٹو کی سیاست ہوتی تھی، اب اینٹی اورپرونوازشریف کی سیاست ہو رہی ہے، پی ٹی آئی اور پیپلزپارٹی کا مقابلہ ہے معلوم نہیں کون جیتے گا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
