لاہور: مسلم لیگ ن کے رہنما خواجہ سعد رفیق کا کہنا ہے کہ ہمیں چور اور غدار کہا جارہا ہے، نواز شریف کا کیا جرم ہے کیا آئین کی بات کرنا بغاوت اور غداری ہے۔
اے آر وائی نیوز کی رپورٹ کے مطابق مسلم لیگ ن کے رہنما خواجہ سعد رفیق نے جلسے سے خطاب کرتے ہوئے کہا کہ ملک میں ہر طرف انتشار اور تلخی ہے، ہم نے جھگڑا نہ کرنے کی کوشش کی لیکن اب کوئی راستہ نہیں ہے۔
انہوں نے کہا کہ نواز شریف اور ان کے ساتھیوں کا چہرہ داغدار کرنے کی سازش کی گئی، حمزہ شہباز، سید خورشید شاہ طویل عرصے سے جیل میں کیوں ہیں، تم نے شہباز شریف کو نہیں پنجاب کی خدمت کا پابند سلاسل کیا ہے، جیلیں، مقدمے، الزام، جبر مسلم لیگ کے شیروں کا راستہ نہیں روک سکتے۔
خواجہ سعد رفیق نے کہا کہ 2 برس ہم نے اور قوم نے برداشت کیا لیکن تم نے کام نہیں کیا، غربت بیروزگاری بڑھ گئی ہے، عزتیں محفوظ نہیں، ملکی معیشت کا بیڑہ غرق کردیا گیا ہے۔
مسلم لیگ ن کے رہنما نے کہا کہ نئے پاکستان کا دعویٰ کرکے لوگوں کو سبز باغ دکھائے گئے، ہم نے ساری زندگی جمہوریت، آئین اور قانون کی پاسداری کی ہے۔
انہوں نے کہا کہ نواز شریف کے خلاف سازش کی گئی، نواز شریف نے جدید پاکستان کی بنیاد رکھی، نئے پاکستان والوں نے کونسا نیا پراجیکٹ دیا ہے۔
سعد رفیق نے کہا کہ جب کوئی راستہ نہیں بچا تو ہم نے پی ڈی ایم اے بنائی، ہم چاہتے ہیں ملک کو آئین کے مطابق چلاؤ، حزب اختلاف کی 11 جماعتیں حکومت کی کارکردگی سے مطمئن نہیں۔
