کراچی : ایف آئی اے امیگریشن نے جناح انٹرنیشنل ایئرپورٹ پر مختلف کارروائیاں کرتے ہوئے بیرون ملک جانے والے تین مسافروں کو گرفتار کرلیا۔
اس حوالے سے ذرائع کا کہنا ہے کہ ان تینوں ملزمان کا نام ایگزٹ کنٹرول لسٹ میں شامل تھا اور انہیں ملک سے فرار ہوتے ہوئے حراست میں لے لیا گیا۔
ایف آئی اے ذرائع کے مطابق کراچی سے دبئی جانے والا مسافر وحید علی لغاری قتل کے مقدمے میں ملوث نکلا۔
ملزم وحید علی لغاری نے سندھ کے شہر دادو میں قتل کی واردات کی تھی اور گرفتاری سے بچنے کیلئے غیرملکی ایئر لائن سے دبئی فرار ہو رہا تھا۔ ایف آئی اے کے عملے نے مذکورہ مسافر کو حراست میں لے کے پولیس کو مطلع کردیا۔
دوسری کارروائی میں ایف آئی اے امیگریشن نے پاکستانی پاسپورٹ پر سفر کرنے والے دو ایرانی باشندوں کو گرفتار کرلیا، دونوں مسافر کراچی سے غیرملکی ایئر لائن سے شارجہ جا رہے تھے۔
امیگریشن حکام کے مطابق محمد علی اورعبدالصمد ایرانی باشندے ہیں، دونوں مسافروں کو حراست میں لے کر تفتیش شروع کر دی گئی ہے۔
ایف آئی اے کے مطابق محمد علی پاکستانی پاسپورٹ نمبر اے ایم 1833501 اور عبدالصمد پاکستانی پاسپورٹ نمبر اے کیو 5271791 سے سفر کر رہا تھا۔
ذرائع کا کہنا ہے کہ دونوں ایرانی مسافروں کے پاس پاکستانی شناختی دستاویزات موجود تھیں، ایرانی باشندہ عامر علی کی دستاویزات پر بلوچستان کے ضلع کیچ کا ایڈریس درج ہے۔
اس کے علاوہ دوسرے ایرانی باشندے عبدالصمد کی دستاویزات پر بلوچستان کے ضلع آواران کا ایڈریس درج ہے۔
