سندھ کے شہری بوند بوند کو ترس گئے، خدا کے واسطے انہیں پانی دو، خورشید شاہ
The news is by your side.

Advertisement

سندھ کے شہری بوند بوند کو ترس گئے، خدا کے واسطے انہیں پانی دو، خورشید شاہ

اسلام آباد : اپوزیشن لیڈر خورشید شاہ نے قومی اسمبلی میں خطاب کرتے ہوئےکہا ہے کہ سندھ کی عوام پانی کی بوند بوند کو ترس رہی ہے، خدا کے واسطے انہیں پانی دو۔

تفصیلات کے مطابق خورشید شاہ نے قومی اسمبلی میں خطاب کرتے ہوئے کہا ہے کہ  پاکستان کو بچانے کیلئے خورشید شاہ کو سندھ بارڈر بند کرنا پڑا تو کریں گے، ہم چاہے جل جائیں سندھ کے حقوق کی جنگ لڑیں گے۔ حیدرآباد کا جلسہ ٹریلر تھا، سندھ کے شہری پانی کی بوند بوند کو ترس رہے ہیں ، خدا کے واسطے انہیں پانی دو۔

اپوزیشن لیڈر خورشید شاہ کا کہنا تھا کہ  یہ دوتہائی اکثریت کے باوجود ایوان میں نہیں آتے، سندھ کو پانی نہیں دینگے تو خدا کی قسم سندھ کی سرحد بند کردیں۔

دوسری جانب خورشید شاہ نے ایم کیو ایم کو آڑھے ہاتھوں لیتے ہوئے کہا ہے کہ مہاجر کا مطلب یہ ہے کہ تھوڑے دنوں کیلئے آئے اور واپس چلے گئے، یہ سندھ کے لوگ ہیں، سندھ کے عوام کے خلاف کیسے بات کرسکتے ہیں۔

خورشید شاہ کا کہنا تھا کہ لعنت بھیجنی ہوگی اس شخص پرجوسندھ توڑنے کی بات کررہا ہے، یہ کہہ دیں کہ کراچی کو سندھ کا حصہ نہیں مانتے تو الگ بات ہے، سندھ اور پاکستان توڑنے کی بات کرنے والوں کو کیا کہیں گے۔

ایم کیوایم پر تنقید کرتے ہوئے اپوزیشن لیڈرکا کہنا تھا کہ بانی ایم کیوایم مسلسل یہ کہتے رہے کہ میں سندھی ہوں، اور آپ نے اس کے ہی خلاف بغاوت کردی۔

اپوزیشن لیڈر کا کہنا تھا کہ ایم کیو ایم نے اپنے ہی لوگوں کے گھراجاڑے ہیں پھر بھی ان لوگوں کو شرم نہیں آتی، ایم کیو ایم دو ٹکڑے ہوچکی ہے۔ پاکستان پیپلز پارٹی میں تمام زبانیں بولنے والے موجود ہیں۔

ان کا کہنا تھا کہ کراچی ہمارا ہے کسی کی جاگیر نہیں ہے، یہ قائد اعظم کا شہر اورسندھ کا دارالخلافہ ہے اور کراچی پاکستان کا دارالخلافہ رہا ہے۔

انہوں نے کہا کہ اس قسم کی باتیں کرنے سے مسئلہ حل نہیں ہوگا، آپ کبھی ادھربھٹکتے ہیں تو کبھی اُدھر بھٹکتے ہیں، اب آپ کو کوئی نہیں بچائے گا، آپ پہاڑ سے ٹوٹے ہیں، اور اب پتھر ہیں اس لیے ٹھوکریں ہی لگیں گی۔

خورشید شاہ کا کہنا تھا کہ ایم کیوایم کوتوپانی کی بھی فکرنہیں، کیا یہ ضروری ہے کہ بلوچستان اور کے پی کے کی طرح سندھ بھی کھڑا ہو۔ حکمراں کہاں ہیں، انہیں خول سے باہر نکالیں، ان ہی حکمرانوں نے پارلیمنٹ کا یہ حال کردیا ہے جس کے باعث کوئی عزت نہیں کرتا۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Comments

comments

یہ بھی پڑھیں