وفاقی وزیر خورشید شاہ نے کہا ہے کہ عمران خان سمیت کسی کو قانون ہاتھ میں لینے کی اجازت نہیں پی ٹی آئی قانون کا احترام کرنے کے بجائے ماحول خراب کر رہی ہے۔
اے آر وائی نیوز کے مطابق وفاقی وزیر خورشید شاہ نے سکھر میں احتساب عدالت کے باہر میڈیا سے گفتگو کرتے ہوئے کہا کہ حکومت کی کوشش ہے کہ ملک کے حالات خراب نہ ہوں اور وہ معاملے کو بہتر بنانے کی کوشش کر رہی ہے۔
اے آروائی نیوز براہِ راست دیکھیں live.arynews.tv پر
پی پی رہنما نے کہا کہ اس وقت سندھ میں بارش نے ہر طرف تباہی مچا دی ہے، ہم سب لوگوں کو بچانے کے لیے نکلے ہوئے ہیں، میں خود علاقے میں حالات سے نمٹنے کے لیے نکلا ہوا ہوں، سب کی کوشش ہے کہ لوگوں کو مشکل وقت سے نکالا جائے۔
ان کا کہنا تھا کہ گزشتہ رات 4 بچوں کی اموات کے معاملے کا نوٹس لیا ہے، ڈاکٹروں کا انسانیت کے ناطے دن رات ڈیوٹی پر ہونا لازمی ہے، غفلت کرنے والے ڈاکٹرز کے خلاف سخت کارروائی ہوگی۔