کراچی : گرفتاری کے خوف سے پیپلز پارٹی کے سنیئر رہنما خورشید شاہ کے بیٹوں اور مبینہ فرنٹ مین نے عدالت سے رجوع کیا ، جس پر عدالت نے تینوں کی 16 اکتوبرتک عبوری ضمانت قبل از گرفتاری منظور کرلی۔
تفصیلات کے مطابق پیپلز پارٹی کے سنیئر رہنما خورشید شاہ کی گرفتاری کے بعد ان کے صاحبزادوں کے گرد بھی گھیرا تنگ کیا جارہا ہے ، گرفتاری کے خوف سے خورشید شاہ کے دو بیٹوں فرخ شاہ اور زریق شاہ نے ضمانت کے لیے سندھ ہائی کورٹ میں درخواست دائر کردی۔
دوسری جانب خرشید شاہ کے مبینہ فرنٹ مین سید قاسم علی شاہ نے بھی ضمانت کی درخواست کردی ہے ، درخواست میں موقف اختیار کیا گیا ہے کہ خورشید شاہ کی گرفتاریوں کے بعد ان کی بھی گرفتاریوں کا خدشہ ہے، نیب تحقیقات میں شامل ہونے کو تیار ہیں مگر ضمانت دی جائے۔
مزید پڑھیں: نیب نے پی پی رہنما خورشید شاہ کو گرفتار کر لیا
بعد ازاں سند ہائی کورٹ نے پیپلزپارٹی رہنما خورشید شاہ کے بیٹوں اور فرنٹ مین کی درخواست ضمانت پر سماعت کی اور 16 اکتوبرتک عبوری ضمانت قبل از گرفتاری منظور کرلی۔
عدالت کی درخواست گزاروں کو 5،5لاکھ روپے مچلکےجمع کرانے کا حکم دیتے ہوئے تینوں درخواست گزاروں کونیب سےتعاون کی ہدایت کی۔
یاد رہے دو روز قبل آمدن سے زائد اثاثہ جات کیس میں نیب راولپنڈی اور سکھر نے مشترکہ کارروائی کرتے ہوئے پی پی رہنما خورشید شاہ کو گرفتار کیا تھا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں