اسلام آباد: وفاقی وزیر خارجہ خواجہ آصف نے ٹرمپ انتظامیہ پر زور دیا ہے کہ افغانستان میں امن و امان کو قائم کرنے کے لیے طالبان سے مذاکرات کیے جائیں۔
اسلام آباد میں وال اسٹریٹ جرنل سے گفتگو کرتے ہوئے خواجہ آصف نے کہا کہ افغانستان میں فوجی حل کی سوچ ناکام پالیسی کی عکاسی کرتی ہے، اگر امریکا افغانستان میں مستقل امن قائم کرنا چاہتا ہے تو طالبان سے بات چیت کرے۔
انہوں نے کہا کہ طالبان کے ساتھ امن مذاکرات کا اہتمام ہو سکتا ہے اگر امریکا عسکریت پسند گروہوں میں اثر و رسوخ رکھنے والے ممالک کے ساتھ مل کر کام کرے۔
ان کا مزید کہنا تھا کہ افغانستان میں امریکہ اپنی ناکام حکمت عملی برقرار رکھے ہوئے ہے، طاقت کے ذریعے مسئلہ کا حل نکالنا ناممکن ہے۔
خواجہ آصف نے کہا کہ چار ملکی گروپ میں پاکستان ، چین، امریکہ اورافغانستان کے علاوہ ایسے ممالک کو بھی شامل ہونا چاہیئے جو طالبان میں اثر رسوخ رکھتے ہیں۔
