خیبرایجنسی : سیکیورٹی اداروں نے جشن آزادی کےموقع پردہشت گردی کا بڑا منصوبہ ناکام بنادیا، خیبرایجنسی سے چار خودکش حملہ آوروں کو گرفتار کرلیا گیا ہے، جن سے پانچ خودکش جیکٹس اور اسلحہ بھی برآمد ہوا۔
تفصیلات کے مطابق خیبرایجنسی میں سیکیورٹی اداروں نے کامیاب کارروائی کرتے ہوئے یوم آزادی پر دہشت گردی کا بڑا منصوبہ ناکام بنا دیا، خیبرایجنسی کے علاقے جمرود میں لیویز اور خاصہ دارفورس نے کارروائی کی اور چار مشتبہ خود کش حملہ آوروں کو گرفتار کرلیا۔
گرفتار کئے گئے خود کش حملہ آوروں کے قبضے سے پانچ خودکش جیکٹس اور اسلحہ برآمد کرلیا گیا ہے جبکہ گرفتار حملہ آوروں کو تفتیش کیلئے نامعلوم مقام منتقل کر دیا گیا ہے۔
پولیٹیکل انتظامیہ کا کہنا ہے کہ ملزمان چودہ اگست کو دہشتگردی کی بڑی کارروائی کی منصوبہ بندی کررہے تھے۔
واضح رہے کہ سانحہ کوئٹہ کے بعد ملک بھر میں دہشت گردوں اور جرائم میں ملوث افراد کیخلاف کومبنگ آپریشن شروع کردیا گیا ہے۔
