نئی دہلی : بھارت میں دوستوں نے بھتہ وصولی کی خاطر دوست کو اغوا کرکے قتل کیا اور لاش پی پی ای کٹ میں ڈال کر نذر آتش کردی۔
غیر ملکی خبر رساں ادارے کی رپورٹ کے مطابق بھارتی ریاست اتر پردیش کے شہر آگرہ میں قتل کی اندوہناک واردات رونما ہوئی، جس میں کاروباری شخصیات کے بیٹوں نے اپنے ہی دوست کو بھتہ وصولی کی غرض سے اغوا کرلیا۔
مغوی نے اغوا کاروں کو پہنچانا تو انہوں نے پکڑے جانے کے ڈر سے 25 سالہ مغوی دوست سچن چوہان کو گلا دبا کر موت کی نیند سلا دیا۔
قتل کے بعد دوستوں نے ثبوت مٹانے کےلیے دوست کی لاش کو پی پی ای کٹ میں رکھ کر نذر آتش کردیا تاہم پولیس نے پھر بھی ملزمان کو گرفتار کرلیا۔
پولیس کا کہنا ہے کہ مقتول 21 جون کو اپنی والدہ سے تھوڑی دیر میں واپس آجائے گا بول کر باہر نکلا تھا لیکن پھر واپس ہی نہیں لوٹا۔
پولیس کا کہنا ہے کہ اغوا کاروں میں ایک بڑی کاروباری شخصیت کا بیٹا بھی ملوث ہے، پولیس نے پانچ ملزمان کو گرفتار کرلیا ہے اور ان کی نشاندہی پر مختلف جہگوں پر چھاپے بھی مار رہی ہے۔
