لندن: کنگ چارلس نے امیر قطر کے استقبال میں چند عربی جملے ادا کیے، جس کی ویڈیو وائرل ہوئی ہے۔
غیر ملکی میڈیا رپورٹس کے مطابق برطانوی بادشاہ چارلس نے امیر قطر شیخ تمیم بن حمدان الثانی کا، بکنگھم پیلس میں استقبال کے دوران عربی میں خیر مقدم کیا۔
قطری امیر شیخ تمیم بن حمدان الثانی شاہ چارلس سوم کی دعوت پر سرکاری دورے پر برطانیہ میں ہیں، بکنگھم پیلس میں منعقدہ اسٹیٹ ڈنر میں شاہ چارلس نے مہمان کا عربی زبان کے الفاظ میں خیر مقدم کیا۔
برطانوی شاہی فضائیہ کے دو جنگی طیارے خیر مقدم کرنے اور جشن منانے کے لیے امیر قطر کے طیارے کے ساتھ برطانیہ کی فضائی حدود میں داخل ہوئے تھے۔
اسٹیٹ ڈنر کے موقع پر امیر قطر کا خیر مقدم کرتے ہوئے کنگ چارلس نے ابتدا باقاعدہ طور پر ’السلام علیکم‘ کہتے ہوئے کی، انھیں عربی میں بولتے ہوئے دیکھ کر سب حیران رہ گئے۔
انگریزی میں چند جملے ادا کرنے کے بعد شاہ چارلس نے امیر قطر کی طرف دیکھ کر عربی میں کہا ’’برطانیہ میں دوبارہ آنے پر خوش آمدید، یہ آپ کا دوسرا گھر ہے۔‘‘
واضح رہے کہ امیر قطر الشیخ تمیم بن حمد آل ثانی کے برطانیہ کے سرکاری دورے کے موقع پر دونوں ممالک نے انسانی بحرانوں اور بین الاقوامی ترقیاتی اقدامات سے نمٹنے کے لیے اپنی مشترکہ فنڈنگ کو دوگنا کر کے 100 ملین ڈالر کرنے کا عزم کیا ہے۔
View this post on Instagram
