The news is by your side.

دوستوں سے مشورہ کریں گے منگل تک انتظار کرنا ہے یا پھر ریڈ زون جانا ہے: چیئرمین کسان اتحاد

اسلام آباد: چیئرمین کسان اتحاد نے کہا ہے کہ وزیر اعظم شہباز شریف نے تمام مطالبات پورا کرنے کی یقین دہانی کرائی ہے، اب ہم اپنے دوستوں سے مشورہ کریں گے کہ منگل تک انتظار کرنا ہے یا پھر ریڈ زون جانا ہے۔

تفصیلات کے مطابق کسان اتحاد اور حکومتی وفد میں مذاکرات ہونے کے بعد دونوں جانب سے مخالفانہ بیانات سامنے آ رہے ہیں، وزیر داخلہ رانا ثنا اللہ نے کسانوں کا دھرنا بلا جواز قرار دے دیا، جب کہ کسان اتحاد کے چیئرمین خالد حسین باٹھ نے کہا کہ رانا ثنا اللہ نے کہا کسانوں کو دیکھ لوں گا، میں نے رانا ثنا کو کہا آپ کو بھی دیکھ لیں گے۔

چیئرمین کسان اتحاد خالد حسین باٹھ نے دھرنے کے شرکا سے خطاب کرتے ہوئے کہا کسانوں کی طاقت کی بدولت دس دن کا کام ایک دن میں ہو رہا ہے، رانا ثنااللہ نے آج وزیر اعظم سے بات کرانے کی پیشکش کی، حکومت سمجھ رہی تھی رانا ثنا کسانوں کو ڈرا دھمکا لے گا۔

انھوں نے کہا وزیر اعظم کے دھرنا ختم کرنے کی درخواست کو مسترد کر دیا، کسان اپنا مقصد پورا کیے بغیر واپس نہیں جائیں گے، پیر کے روز پاور کمیٹی اور کسانوں کی میٹنگ ہوگی، اس میں بجلی ٹیرف پر بات ہوگی، حکومت سے کھاد کے مسئلے پر بات ہوئی ہے، کسان اتحاد کا دھرنا پیر تک جاری رہے گا، نوٹیفکیشن لیے بغیر دھرنا ختم کر کے نہیں جائیں گے۔

خالد باٹھ نے کہا کہ وزیر اعظم نے پیر کو کسانوں کے مطالبات کا حکم نامہ جاری ہونے کی یقین دہانی کرائی ہے، کسان پرامن تھے اور پر امن رہیں گے، اور کسی صورت فساد کی طرف نہیں جائیں گے،وفاقی انتظامیہ کسی بھی قسم کی سختی سے گریز کرے۔

وزیر داخلہ رانا ثنا نے کہا کہ کسانوں کا دھرنا بلا جواز ہے، آج کسان اتحاد سے ملاقات میں ان کو صورت حال سے آگاہ کر دیا گیا ہے، زرعی ٹیوب ویل بجلی کے بلوں میں کمی کے لیے کیبنٹ کی قائم کمیٹی کام کر رہی ہے، حکومت کسانوں کے جائز مطالبات کو سنجیدہ لے رہی ہے، ٹیوب ویلز کے بلوں کی ادائیگی مؤخر کرنے کا مطالبہ تسلیم کیا جا چکا ہے۔

انھوں نے کہا ریڈ زون ریڈ لائن ہے، کسی کسان، گروہ یا جماعت کو ریڈ زون میں احتجاج یا دھرنے کی اجازت نہیں، ریڈ زون کی طرف مارچ کرنے والوں کے خلاف قانون حرکت میں آئے گا۔

Comments

یہ بھی پڑھیں