The news is by your side.

Advertisement

کراچی: ملیر ندی میں ایک بار پھر طغیانی، کورنگی کاز وے روڈ بند کردیا گیا

کراچی: صوبہ سندھ کے دارالحکومت کراچی کی ملیر ندی میں ایک بار پھر طغیانی پیدا ہوگئی جس کے بعد ندی سے متصل سڑکوں کو بند کردیا گیا۔

تفصیلات کے مطابق شہر کراچی میں ملیر ندی میں طغیانی کے باعث کورنگی کاز وے پر پانی سڑک پر آگیا، سڑک زیر آب آنے کی وجہ سے ٹریفک کی روانی شدید متاثر ہوگئی۔

ترجمان کورنگی پولیس کا کہنا ہے کہ کورنگی کاز وے روڈ کو ٹریفک کے لیے مکمل طور پر بند کر دیا گیا ہے، محمود آباد سے کورنگی آنے اور جانے والی سڑکوں کو بند کر دیا گیا جبکہ قیوم آباد سے کورنگی جانے والی سڑک کو بھی ٹریفک کے لیے بند کردیا گیا۔

ترجمان کا مزید کہنا ہے کہ ٹریفک کو جام صادق پل، بروکس چورنگی اور بلال چورنگی کی طرف موڑا جا رہا ہے۔

خیال رہے کہ گزشتہ روز ملیر، گڈاپ اور سرجانی ٹاؤن میں بارش سے ملیر ندی میں پانی کی سطح میں اضافہ ہوا ہے۔

چند دن قبل کراچی میں طوفانی بارشوں کے بعد بھی ملیر ندی کے آس پاس کی سڑکیں زیر آب آگئی تھیں جس کے بعد جام صادق پل کے علاوہ دیگر تمام راستے بند کردیے گئے تھے۔

Comments

یہ بھی پڑھیں