پشاور میں تیز آواز سے ماحول کو متاثر کرنے والی گاڑیوں کے خلاف کریک ڈاون شروع
The news is by your side.

Advertisement

پشاور میں تیز آواز سے ماحول کو متاثر کرنے والی گاڑیوں کے خلاف کریک ڈاون شروع

پشاور : خیبر پختونخواہ میں ٹریفک پولیس بھی کلین اینڈ گرین پاکستان بنانے میں حکومت کے شانہ بشانہ کھڑے ہوگئی، پولیس نے کاروائی کرتے ہوئے فضائی آلودگی پھیلانے والی گاڑیوں سمیت تیز آواز سے ماحول کو متاثر کرنے والی گاڑیوں کے خلاف کریک ڈاون شروع کردیا۔

تفصیلات کے مطابق خیبر پختونخواہ کے دارلحکومت پشاور میں ٹریفک پولیس نے خوفناک ہارن کے خلاف جاری مہم تیز کردی، گرین اینڈ کلین پاکستان مہم کے تحت تیز ہارن اور ماحول آلودہ کرنے والی گاڑیوں کے 801 ڈرائیوروں سے پریشر ہارن،فلیش لائٹس سمیت دیگر سامان قبضے میں لے کر بلڈوزر سے مسمار کردیا گیا۔

ٹریفک قوانین کی خلاف ورزی کرنے والے 5300 افراد کو جرمانہ بھی کیا گیا۔

وی او ایس ایس پی ٹریفک کاشف ذوالفقار کا کہنا تھا کہ ٹریفک پولیس بھی حکومت کی کلین اینڈ گرین کمپین کو مزید بہتر بنائے گی، اس کے علاوہ ٹریفک قوانین کی خلاف ورزی کرنے والوں کو چالان کرکے13لاکھ روپے بھی قومی خزانے میں جمع کروائے گئے۔

ٹریفک حکام کے مطابق عام شہراہوں کے ساتھ ساتھ سکول کالجز اور ہسپتالوں کے اطراف بھی تیز ہارن سے شہریوں کو پریشان کرنے والوں کے خلاف خوفناک ہارن کی روک تھام مہم جاری رہے گی۔

یاد رہے چند روز قبل پشاور پولیس نے وزیراعظم کے کلین اینڈ گرین پاکستان کے تحت فضائی آلودگی کے خاتمہ کیلئے منظم کاروائی کا فیصلہ کیا تھا، اس ضمن میں پہلے مرحلے میں شہر کو فضائی آلودگی اور شور سے بچانے کی خاطر زیادہ دھواں چھوڑنے والی گاڑیوں اور پریشر ہارن کے خلاف خصوصی آگاہی مہم چلائے گی اور اس دوران ڈرائیورز کو اس سے ہونے والے نقصانات سے آگاہ کیا جائے گا۔

دوسرے مرحلے میں خصوصی مہم کے بعد ایسی گاڑیوں کے خلاف بھر پور کاروائیاں کی جائیں گی۔

Comments

comments

یہ بھی پڑھیں