The news is by your side.

Advertisement

سیاحتی مقامات پر ریسٹ ایریاز کی فراہمی کے لیے احکامات جاری

پشاور: خیبر پختونخواہ حکومت نے سیاحت کے فروغ کے لیے اقدامات کرنے کا فیصلہ کرتے ہوئے سیاحتی مقامات پر ریسٹ ایریاز کی فراہمی کے لیے احکامات جاری کردیے۔

تفصیلات کے مطابق سینئر وزیر عاطف خان کی زیر صدارت اہم اجلاس منعقد ہوا۔ اجلاس میں خیبر پختونخواہ حکومت نے سیاحت کے فروغ کے لیے اقدامات کرنے کا فیصلہ کرلیا۔

اجلاس میں سیاحتی مقامات پر کیمپنگ پوڈز لگانے کا حتمی فیصلہ کرلیا گیا۔ کیمپنگ پوڈز گبین، جبہ، گولن گول، بیاڑی، اناکڑ اور الائی میں لگائے جائیں گے۔

سینئر وزیر نے تمام کیمپنگ پوڈز عید سے قبل لگانے کے احکامات دیے۔ تمام سیاحتی مقامات پر ریسٹ ایریاز کی فراہمی کے لیے بھی احکامات جاری کردیے گئے جبکہ ٹورازم پولیس کی تعیناتی اور سیاحتی مقامات پر بس سروس پر بھی غور ہوا۔

اس سے قبل سول ایوی ایشن اتھارٹی نے سیاحت کے فروغ کے لیے سیدو شریف (سوات) ایئرپورٹ ،پارہ چنار اور چترال ایئرپورٹ پر ترقیاتی کام بھی شروع کروا دیا تھا۔

ذرائع کا کہنا ہے کہ 8 کروڑ روپے کی لاگت سے سوات ایئرپورٹ کو قابل استعمال بنانے کے لیے کام کا آغاز کردیا گیا ہے، سوات اور پارہ چنار ایئرپورٹ 2 ماہ کے اندر اندر مکمل کیا جائے گا۔

سوات ایئرپورٹ کو 1978 میں تعمیر کیا گیا تھا، بعد ازاں امن و امان کی صورتحال کے باعث سنہ 2004 میں سیدو شریف ایئرپورٹ کو بند کردیا گیا تھا۔

ذرائع کے مطابق سوات اور پارہ چنار ایئر پورٹ پر سیاحت کے فروغ کے لیے نیو ایوی ایشن پالیسی کے تحت ایئر لائنز کو مراعات بھی دی جائیں گی، اس کے علاوہ مختلف ایئر لائنز کو لینڈنگ، چارجنگ اور پارکنگ سمیت دیگر مراعات بھی فراہم کی جائیں گی۔

Comments

comments

یہ بھی پڑھیں