The news is by your side.

Advertisement

سیاحت کے فروغ کے لیے پشاور سے اٹک تک سفاری ٹرین کا دل چسپ سفر

پشاور: خیبر پختونخوا کے ٹورازم کارپوریشن نے ملک میں سیاحت کے فروغ کے لیے انوکھا اور دل چسپ قدم اٹھا لیا، سفاری ٹرین پشاور سے اٹک تک چلا دی۔

تفصیلات کے مطابق ٹورازم کارپوریشن کے پی نے لوگوں کو تفریح فراہم کرنے اور ریلوے کی تاریخ سے آگاہ کرنے کے لیے خیبر سفاری ٹرین کا اہتمام کیا، جو پشاور سے اٹک خورد تک چلائی گئی۔

ٹرین 70 سیاحوں کو لے کر پشاور ریلوے اسٹیشن سے صبح ساڑھے آٹھ بجے روانہ ہوئی۔

سفاری ٹرین اپنی منزل کی طرف روانہ ہونے سے قبل پشاور ریلوے اسٹیشن پر سیاحوں کا استقبال روایتی بینڈ کی دھنوں سے کیا گیا۔

سیاح پشاور سے اٹک تک کے سفر میں دل کش نظاروں سے خوب محظوظ ہوئے، ٹرین اٹک پہنچی تو سیاحوں نے 1880 میں انگریز دور میں بنائے گئے تاریخی اٹک خورد ریلوے اسٹیشن کی سیر کی۔

دریائے سندھ کے کنارے سیاحوں کے لیے مختلف تفریحی سرگرمیوں کا بھی اہتمام کیا گیا، جس میں رسہ کشی، تیر اندازی، ٹگ آف وار، پتنگ بازی اور اونٹ سواری کے علاوہ موسیقی بھی شامل تھی۔

یہ بھی پڑھیں:  کوشش ہے 66 ممالک کے لیے پاکستان کا ویزا ختم ہو جائے: فواد چوہدری

سیاحوں نے ٹورازم کارپوریشن کے پی کو سراہتے ہوئے کہا کہ اس قسم کی سرگرمیوں کا انعقاد قابل تحسین ہے جس سے نہ صوبے کا مثبت امیج سامنے آئے گا۔

ٹورازم حکام کا کہنا ہے کہ سفاری ٹرین کا مقصد عوام کو تفریح فراہم کرنا اور صوبے میں سیاحت کو فروغ دینا ہے، آئندہ بھی ایسی سرگرمیوں کا انعقاد کیا جائے گا۔

Comments

comments

یہ بھی پڑھیں