اسلام آباد: قومی ٹیم کے وکٹ کیپر بلے باز کامران اکمل کا کہنا ہے کہ ٹی 20 میں محمد رضوان کی جگہ کوئی نہیں لے سکتا۔
کشمیر پریمیئر لیگ (کے پی ایل) میں باغ اسٹالینز کے آئیکون پلیئر کامران اکمل نے میڈیا سے گفتگو کرتے ہوئے کہا کہ ٹی 20 ورلڈ کپ اسکواڈ میں میری جگہ نہیں بنتی جبکہ رضوان کی جگہ ٹی 20 میں کوئی نہیں لے سکتا۔
انہوں نے کہا کہ اب اگر کوئی وکٹ کیپر بلے باز ٹی 20 کھیلے گا تو بطور اسپیشلسٹ بلے باز ہی کھیلے گا۔
مزید پڑھیں: شاہد آفریدی کے پی ایل کے تمام میچز کیوں نہیں کھیلیں گے؟
کامران اکمل نے کہا کہ ٹی ٹوینٹی ورلڈ کپ میں آسٹریلیا کی کنڈیشنز کے لحاظ سے میرٹ پر اسکواڈ منتخب کرنا چاہیے۔
انہوں نے کہا کہ کے پی ایل کے لیے شائقین کرکٹ بہت پرجوش دکھائی دے رہے ہیں اس ایونٹ میں اچھی کرکٹ کھیل کر ٹورنامنٹ کے معیار کو بہتر کرنا چاہتے ہیں۔
کامران اکمل کا کہنا تھا کہ ہر اننگز میں 70 سے 80 رنز بنانا آسان نہیں کیونکہ کرکٹ باتوں سے نہیں کھیلی جاتی ہے اچھی کرکٹ کھیلنے کے لیے میدان میں محنت درکار ہوتی ہے۔
