تہران: ایران میں کروناوائرس سے ہلاک ہونے والے افراد کی تعداد 26 ہوگئی جبکہ تہران حکومت نے ملک میں چینی شہریوں کے داخلے پر پابندی عائد کردی۔
اے آر وائی نیوز کے مطابق ایران نے چینی شہریوں کی ملک میں داخلے پر پابندی لگا دی ہے۔ جبکہ مہلک وائرس سے ہلاکتوں کی تعداد میں بھی اضافہ ہوتا جارہا ہے۔ دوسری جانب ایرانی نائب صدر برائے خواتین وگھریلو امور میں بھی کروناوائرس کی تصدیق ہوگئی ہے۔
ایرانی وزارت صحت کا کہنا ہے کہ ایران میں کروناوائرس سے ہلاکتیں 26ہوگئی ہیں۔ جبکہ ایران میں وائرس سے متاثرہ مریضوں کی تعداد 245ہوگئی ہے۔ شہری ملک بھر میں غیرضروری سفر سے گریز کریں۔
کروناوائرس: وہ 5 ممالک جہاں اماراتی شہریوں کے جانے پر پابندی عائد
ایران میں سینما، ثقافتی تقریبات اور کانفرنسز پر بندش میں ایک ہفتے کی توسیع کردی گئی۔
عالمی ادارہ صحت (ڈبلیو ایچ او) کے مطابق چین کے بعد سب سے زیادہ تیز کروناوائرس اٹلی میں پھیل رہا ہے، اٹلی میں اب تک11علاقوں میں وائرس پھیل چکا ہے۔ اٹلی کے تمام متاثرہ علاقوں عوامی مقامات اور جامعات ایک ہفتے کے لیے بند کردیے گئے ہیں۔ آسٹریا اٹلی کے ساتھ بارڈر بند کرنے پر غور کررہا ہے۔
یورپ بھر میں وائرس کے کئی کیسز سامنے آچکے ہیں۔
