کویت سٹی: سپریم ایڈوائزری کمیٹی نے ایک بیان میں کہا ہے کہ ملک میں 60 فی صد غیر ملکی کرونا وائرس کا شکار ہیں۔
تفصیلات کے مطابق کویت کی سپریم ایڈوائزری کمیٹی کے سربراہ ڈاکٹر خالد الجاراللہ نے کہا ہے کہ کرونا وائرس کی نئی تبدیل شدہ قسم کے پھیلنے سے ملک میں نئے کیسز اور اسپتالوں میں داخلوں کا ریکارڈ ٹوٹ گیا ہے۔
کمیٹی سربراہ نے بتایا کہ ملک میں کرونا وائرس کی شرح میں اضافہ ہو اہے، جن میں 60 فی صد غیر ملکی کرونا انفیکشن کا شکار ہیں، جب کہ کویتی شہریوں کی تعداد 40 فی صد ہے۔
روزنامہ الرای کی رپورٹ کے مطابق ڈاکٹر خالد نے انکشاف کیا کہ ملک میں کرونا انفیکشن کی شرح غیر ملکیوں میں زیادہ ہے۔
انھوں نے کہا کہ کرونا کیسز میں اضافہ ہوا ہے تاہم ویکسینیشن کی شرح میں اضافے سے صحت کے نظام پر اس کے اثرات کم ہو جائیں گے، ڈاکٹر خالد نے عوام سے احتیاطی تدابیر پر سختی سے عمل کرنے کی بھی اپیل کی۔
گزشتہ روز وزارت صحت نے کرونا وائرس کے نئے کیسز سے متعلق رپورٹ جاری کی تھی، جس میں کہا گیا تھا کہ کویت میں ریکارڈ کیے گئے نئے کیسز کی تعداد 1962 تک پہنچ چکی ہے۔
مذکورہ تعداد کویت میں ریکارڈ کی جانے والی اب تک کی سب سے زیادہ تعداد ہے، کمیٹی کا کہنا ہے کہ یومیہ ریکارڈ کیے جانے والے کرونا کیسز کی مجموعی تعداد میں سے آدھے سے زیادہ غیر ملکی ہیں۔
