کویت سٹی : کویتی دفتر خارجہ نے ایتھوپیا کے دارالحکومت عدیس ابابا کے بگڑتے ہوئے حالات کے پیش نظر وہاں مقیم اپنے شہریوں کو خبر دار کیا ہے کہ پہلی فرصت میں واپس آجائیں۔
کویتی ذرائع ابلاغ کے مطابق کویتی دفتر خارجہ نے اپنے بیان میں تمام شہریوں کو ہدایات جاری کی ہیں کہ وہ عدیس ابابا میں قائم کویتی سفارت خانے سے رجوع کرکے اپنے نام، پتے اور دیگر تفصیلات کا اندراج جلد از جلدکرالیں۔
ترجمان دفتر خارجہ کے مطابق مذکورہ بیان میں کویت میں مقیم شہریوں کو بھی ہدایت کی گئی کہ اگر وہ کسی وجہ سے ایتھوپیا جانا چاہتے ہوں تو بہتر یہی ہوگا کہ فی الوقت اپنا سفر ملتوی کردیں۔
یاد رہے کہ ایتھوپیا کی حکومت نے عدیس ابابا کی جانب ٹگرائی عوامی محاذ آزادی کی فورسز کی پیش قدمی کے بعد پورے ملک میں ایمرجنسی نافذ کر رکھی ہے۔
ایتھوپیا کے سرکاری میڈیا کے مطابق ایتھوپیا کی کابینہ نے منگل کے روز ملک بھر میں ہنگامی حالت کا اعلان کیا تھا جب ٹگریان پیپلز لبریشن فرنٹ (ٹی پی ایل ایف) کے باغیوں نے دارالحکومت کی طرف بڑھنے کی بظاہر کوشش میں دو اہم شہروں کا کنٹرول سنبھال لیا۔
ایتھوپیا میں امریکی سفارت خانے نے اپنے شہریوں سے ملک چھوڑنے کے لیے تیار رہنے کا مطالبہ کیا اور کہا کہ ایتھوپیا کے علاقوں میں سکیورٹی کی صورتحال خراب ہو رہی ہے۔
اس نے اپنے فیس بک اکاؤنٹ پر کہا کہ ایتھوپیا میں فوجی تنازعات اور شہری بدامنی کے مسلسل بڑھنے سے سیکیورٹی کی صورتحال بری طرح بگڑ گئی ہے۔
