کویت سٹی: دنیا بھر میں تیل کے ذخائر میں نمایاں کمی واقع ہونے لگی ہے، کویت ذخائر کے حوالے سے 9 ویں نمبر پر آ گیا ہے۔
تفصیلات کے مطابق تیل کی تحقیق میں مہارت رکھنے والی ناروے کی انرجی ریسرچ کمپنی رِسٹاڈ انرجی کی جانب سے جاری کردہ اعداد و شمار میں کہا گیا ہے کہ کویت تیل کے ذخائر کے لیے دنیا میں نویں نمبر پر ہے۔
رپورٹ کے مطابق کویت کے تیل کے ذخائر 53 بلین بیرل ہیں، جب کہ دنیا بھر میں مجموعی طور پر قابل بازیافت تیل اب گزشتہ سال کے مقابلے میں 9 فی صد کم ہے، جس سے عالمی توانائی کی سلامتی کو خطرہ لاحق ہو گیا ہے۔
رِسٹاڈ انرجی نے ان ممالک کا جائزہ لیا ہے جن کے پاس سب سے زیادہ تیل موجود ہے، ان میں 5 بڑے ذخائر اور 275 بلین بیرل کے ساتھ سعودی عرب دنیا میں سب سے زیادہ ذخائر رکھنے والا ملک ہے، اس کے بعد امریکا 193 بلین بیرل کے ساتھ دوسرے نمبر پر، جب کہ روس 137 بلین بیرل کے ساتھ تیسرے نمبر ہے۔
کینیڈا 118 بلین بیرل کے ساتھ چوتھے نمبر پر، عراق 105 بلین بیرل کے ساتھ پانچویں نمبر پر، پھر ایران اور برازیل بالترتیب 84 بلین بیرل اور 71 بلین بیرل کے ساتھ چھٹے اور ساتویں نمبر پر، آٹھویں نمبر پر متحدہ عرب امارات 70 بلین بیرل کے ساتھ، اور کویت 53 بلین بیرل کے ساتھ نویں اور قطر 37 بلین بیرل کے ساتھ دسویں نمبر پر ہے۔
رپورٹ کے مطابق اوپیک ممالک میں مجموعی طور پر تیل کے ذخائر 682 بلین بیرل ہیں، جب کہ اوپیک کے دائرہ کار سے باہر تیل والے ممالک کے پاس یہ ذخائر 891 بلین بیرل ہیں۔
انرجی کمپنی کا کہنا ہے کہ اس وقت دنیا میں مجموعی طور پر 1.572 بلین بیرل تیل نکالا جا سکتا ہے، جو گزشتہ سال کے مقابلے میں تقریباً 9 فی صد کم ہے اور 2021 کے مجموعی تیل سے 152 بلین بیرل کم ہے۔
