کویت سٹی : کویت نے غیرملکیوں کے ڈرائیونگ لائسنس کی دوبارہ جانچ کا فیصلہ کرلیا ہے، اطلاعات کے مطابق خلیجی ریاست کویت میں ٹریفک کا شعبہ خاص طور پر تارکین وطن کو دیے گئے ڈرائیونگ لائسنسوں کو فلٹر کرنے کا ارادہ رکھتا ہے۔
اس اقدام کا مقصد یہ ہے کہ تارکین وطن کو دیے گئے لائسنسوں کے تمام ڈیٹا کا جائزہ لیا جائے اور وزارتی فیصلے میں شامل تقاضوں بالخصوص تنخواہ اور ان کی اہلیت، یا تنخواہ کی شرط پر تنظیمی فیصلے میں دیے گئے استثنیٰ پر عمل درآمد کیا جائے۔
یہ فیصلہ سیکرٹری وزارت داخلہ لیفٹیننٹ جنرل الشیخ فیصل النواف کی ہدایت پر عمل درآمد کو یقینی بنا نے کیلئے کیا گیا ہے۔
اس حوالے سے ذرائع نے بتایا کہ نئی ہدایات کے مطابق ڈرائیونگ لائسنس رکھنے والوں کی جانچ پڑتال کی جائے گی اور تنخواہ کی شرط پوری نہ ہونے کی صورت میں لائسنس واپس لے لیا جائے گا۔
انہوں نے مزید کہا کہ مثال کے طور پر ایسے اکاؤنٹنٹ اور ڈرائیور ہیں جنہوں نے ڈرائیونگ لائسنس حاصل کیے۔ ساتھ ہی ایک میڈیا ملازم جس نے ڈرائیونگ لائسنس حاصل کیا تھا اور تنخواہ کی شرط واضح نہیں تھی اور اسے استثنیٰ دیا گیا تھا لیکن وہ ایک غیر میڈیا فیلڈ میں چلا گیا۔ اس سے بھی ڈرائیونگ لائسنس لے لیا جائے گا۔
کویتی اخبار الانبا کے مطابق جن لائسنسوں کی تجدید کی جاتی ہے اس بات کا تعین کیا جاتا ہے کہ وہ شرائط پر پورا اترتے ہوں۔ جب شرائط کی تجدید نہیں ہوتی تو ان کی تجدید نہیں کی جاتی۔
