The news is by your side.

Advertisement

کویت سفر کرنے والوں کے لیے خوشخبری

کویت سٹی: کویتی حکام نے بین الاقوامی ایئرپورٹ 24 گھنٹے فعال رکھنے کا اعلان کردیا، ایئرپورٹ پر 24 گھنٹے فضائی آپریشن کا آغاز 17 نومبر سے ہوگا۔

کویتی میڈیا کے مطابق سول ایوی ایشن کی جنرل ایڈمنسٹریشن نے کویت بین الاقوامی ہوائی اڈے کو 24 گھنٹوں فعال رکھنے کا اعلان کر دیا ہے جس کا آغاز 17 نومبر سے ہوگا۔

سول ایوی ایشن کے ڈائریکٹر جنرل انجینئر سلیمان الفوزان نے ایئرپورٹ پر صحت کی ضروریات کے جائزے سے متعلق وزارت صحت کو ایک خط ارسال کیا۔

خط میں انہوں نے وضاحت کی کہ وزارت صحت کے نمائندے نے گذشتہ روز تجارتی پروازوں کی دوبارہ بحالی کے لیے ایگزیکٹو کمیٹی کے اجلاس کے دوران کہا کہ اگر رجسٹریشن اور تنظیم کے عملے کی مطلوبہ تعداد اس کے لیے مکمل طور پر تیار ہے تو وزارت صحت کو اس بات پر قطعی اعتراض نہیں ہے کہ ہوائی اڈہ 24 گھنٹے کام کرے۔

یہ اس بات کا اشارہ ہے کہ ناس اور کویت ایئر ویز عملہ فراہم کرنے کے لیے تیار ہیں اور ہوائی اڈہ بھی 17 نومبر سے 24 گھنٹے کام کرنے کے لیے تیار ہے۔

ذرائع کے مطابق ہوائی اڈے کو دن میں 24 گھنٹوں کے لیے چلنے کی اجازت دینے کا مقصد رات کی پروازوں پر پابندی منسوخ کر کے روزانہ 24 گھنٹے پروازوں کی سہولت فراہم کرنا ہے۔

اس اعلان کے بعد پہلے سے طے شدہ پروازوں کے شیڈول اور تعداد پر کوئی فرق نہیں پڑے گا۔ ذرائع کے مطابق سول ایوی ایشن انتظامیہ وزارت صحت کے جواب کا انتظار کر رہی ہے۔

Comments

یہ بھی پڑھیں