کویت سٹی : کویت کے تمام بینکوں میں ماہ رمضان المبارک کے دوران کام کرنے کے اوقات کار مقرر کردیئے گئے ہیں، اس حوالے سے سرکلر بھی جاری کردیا گیا ہے۔
کویت بینکنگ ایسوسی ایشن کی جانب سے جاری کیے گئے حکم نامے میں کہا گیا ہے کہ ماہ رمضان میں پورا ہفتہ صبح 10 بجے سے دوپہر 01:30 بجے تک کسٹمرز کو سروسز فراہم کی جائیں گی۔
کویت بینکنگ ایسوسی ایشن نے ہدایت کی ہے کہ کام کے اوقات کے دوران تمام صورتوں میں صحت کی تمام تر ضروریات اور ایس او پیز پر عمل پیرا ہونے کی ضرورت کو مدنظر رکھا جائے۔
اس کے علاوہ صحت حکام کے ذریعہ طے شدہ پابندیوں اور ہدایات کے ساتھ ساتھ کام کی ضروریات اور نوعیت کے مطابق طریقہ کار اور مکمل قواعد کے تحت کام کرنے والے ضوابط وضع کئے جائیں۔
جاری کیے گئے سرکلر میں کویت بینکنگ ایسوسی ایشن کی جانب سے تمام اعلیٰ افسران کو ہدایت کی گئی ہے کہ رمضان المبارک کے دوران ملازمین کا خصوصی خیال رکھیں۔
یاد رہے کہ گزشتہ ماہ کویتی کابینہ نے کورونا کی صورتحال میں بہتری آنے پر اطمینان کا اظہار کرتے ہوئے معمولات زندگی کو بحال کرنے کی منظوری دی تھی ۔
