کویت: کویت کی وزارت صحت نے آسٹرا زینیکا، آکسفورڈ ویکسین کی دوسری خوراک کا انتظار کرنے والے افراد کی ویکسی نیشن جلد مکمل کرنے کا اعلان کر دیا ہے۔
کویت کی وزارت کے مطابق کویت کو آسٹرا زینیکا آکسفورڈ ویکسین کی کھیپ اگلے دس دنوں میں ملنے کی توقع ہے، جس کے بعد دوسری خوراک کا انتظار کرنے والے افراد کی ویکسی نیشن کا عمل جلد مکمل کر دیا جائے گا۔
اس سلسلے میں وزیر صحت شیخ ڈاکٹر باسل الصباح نے بتایا کہ مذکورہ ویکسین کی دوسری خوراک کا انتظار کرنے والے ہر شخص کو 10 دن کے اندر متوقع کھیپ ملنے کے بعد دوسری خوراک دے دی جائے گی۔
ایک ٹی وی انٹرویو میں ان کا کہنا تھا ویکسینیشن کا عمل مکمل کرنے کے لیے 30 مراکز آپریٹ کیے جائیں گے۔
شیخ باسل کا کہنا تھا کہ صحت کی صورت حال میں نمایاں پیش رفت ہوئی ہے، تاہم ان کا یہ بھی کہنا تھا کہ آسٹرا زینیکا ویکسین کی آمد میں تاخیر کے سبب نہ صرف کویت بلکہ تمام خلیجی ممالک کو نقصان پہنچا ہے۔
وزیر صحت ڈاکٹر باسل الصباح نے اعلان کیا کہ کویت نے موڈرنا اور جانسن اینڈ جانسن ویکسینز درآمد کرنے کا بھی معاہدہ کر لیا ہے۔
