کویت سٹی: کویت نے 7 ممالک بھارت، بنگلہ دیش، سری لنکا، فلپائن، شام، لبنان اور مصر سے ایک ہفتے کے لیے فضائی آپریشن بند کر دیا ہے، کویت سے پاکستان کے لیے فلائٹ شیڈول معمول کے مطابق جاری رہے گا۔
تفصیلات کے مطابق کرونا وائرس کے پھیلاؤ کے پیش نظر کویت نے 7 ممالک سے ایک ہفتے کے لیے فضائی آپریشن بند کر دیا۔ فلائٹ شیڈول معطل کرنے کے حوالے سے سرکلر بھی جاری کردیا گیا ہے۔
مذکورہ ممالک میں بھارت، بنگلہ دیش، سری لنکا، فلپائن، شام، لبنان اور مصر شامل ہیں۔ فیصلہ کویت ہیلتھ ڈیپارٹمنٹ کی جانب سے جاری ہدایات کی روشنی میں کیا گیا ہے۔
سرکلر میں کہا گیا ہے کہ کویت ایئرپورٹ پر فلائٹ آپریشن 7 سے 14 مارچ تک معطل رہے گا۔ ساتوں ممالک کے تمام ویزا ہولڈرز پر کویت داخلے پر پابندی ہو گی، کویت کی شہریت رکھنے والے مسافروں پر پابندی کا اطلاق نہیں ہوگا۔
کویت سے پاکستان کے لیے فلائٹ شیڈول معمول کے مطابق جاری رہے گا۔
خیال رہے کہ دنیا بھر میں کرونا وائرس سے متاثرہ افراد کی تعداد ایک لاکھ سے تجاوز کر گئی ہے جبکہ اموات کی تعداد بھی 3 ہزار 412 ہوگئی ہے۔
مختلف ممالک میں اب تک کرونا وائرس کا شکار 57 ہزار مریض صحتیاب بھی ہوچکے ہیں۔
