کویت سٹی : کویتی حکام نے حفظان صحت کے اصولوں کو مدنظر رکھتے ہوئے ریسٹورانٹس اور کیفے کھولنے کا اعلان کردیا۔
عرب میڈیا کی رپورٹ کے مطابق خلیجی ریاست کویت نے مہلک وبا کرونا وائرس پر قابو پانے کےلیے عائد کردہ پابندیوں میں نرمی کا فیصلہ کرلیا۔
پابندیوں میں نرمی کا فیصلہ کویت کی ورزاء کونسل کی جانب سے کیا گیا، جس میں کہا گیا ہے کہ ملک میں کرونا وائرس کی صورتحال بہتر ہونے کے سبب معمولات زندگی آہستہ آہستہ بحالی کی جانب گامزن ہیں۔
وزراء کونسل نے کرونا وائرس کی وبائی صورتحال بہتر ہونے پر ملک بھر میں ریسٹورنٹس اور کیفے دوبارہ کھولنے کا اعلان کیا ہے، فیصلے کا اطلاق 23 مئی بروز اتوار سے ہوگا۔
کویت حکام کا کہنا ہے کہ شہری و غیرملکی حفظان صحت کے اصولوں کو مدنظر رکھتے ہوئے ریسٹورنٹس اور کیفوں میں داخل ہوسکیں گے۔
عرب میڈیا کا کہنا ہے کہ کویتی وزراء کونسل کی جانب سے شیشہ ‘حقہ’ کیفوں کو کھولنے کا فیصلہ تاحال ملتوی کردیا گیا ہے۔
عرب خبر رساں ادارے کا کہنا ہے کہ کویت حکام کی جانب سے سفری پابندیوں میں نرمی پر بھی غور کیا جارہا ہے۔ بالخصوص ان لوگوں کےلیے جو کرونا ویکسین لگوا چکے ہیں اور ملک کی طرف سے طے شدہ ادارہ جاتی قرنطینہ کی مدت پوری کرچکے ہیں۔
